Staršynia Narviežskaha Nobieleŭskaha kamiteta zaklikała biełaruskija ŭłady vyzvalić Bialackaha z turmy
Aleś Bialacki staŭ čaćviortym čałaviekam, jaki atrymaŭ Nobieleŭskuju premiju miru, znachodziačysia ŭ turmie abo pad vartaj.
07.10.2022 / 12:50
Staršynia Narviežskaha Nobieleŭskaha kamiteta, jaki prysudžaje Nobieleŭskuju premiju miru, spadarynia Bieryt Rejs-Andersan adznačyła: dziakujučy svaim paśladoŭnym namahańniam na karyść čałaviečych kaštoŭnaściej, antymilitaryzmu i pryncypaŭ prava, «sioletnija łaŭreaty adnavili i ŭšanavali bačańnie miru i braterstva pamiž narodami Alfreda Nobiela — bačańnie, jakoje siońnia najbolš patrebnaje ŭ śviecie».
Jana taksama zaklikała biełaruskija ŭłady vyzvalić Alesia Bialackaha z turmy, kab jon moh pryjechać u Osła i asabista pryniać uznaharodu.
Kamitet vykazaŭ spadziavańni, što premija padymie bajavy duch pravaabaroncy.
Siońnia stała viadoma, što biełaruski pravaabaronca Aleś Bialacki atrymaŭ Nobieleŭskuju premiju miru. Ciapier jon znachodzicca za kratami, jak i mnohija inšyja biełaruskija pravaabaroncy.