Kijeŭ atakavany dronami-kamikadze
U centry Kijeva ranicaj u paniadziełak adbyłosia prynamsi čatyry vybuchi. Ukrainskija ŭłady zajaŭlajuć ab napadzie rasijskich dronaŭ-kamikadze iranskaj vytvorčaści. Udary naniesienyja praz tydzień paśla masiravanych abstrełaŭ enerhietyčnaj infrastruktury Ukrainy.
17.10.2022 / 07:56
Ab čatyroch vybuchach u centralnym Šaŭčenkaŭskim rajonie Kijeva ranicaj napisaŭ u svaim telehram-kanale mer horada Vital Kličko.
«Stalicu atakavali dronami-kamikadze», — udakładniŭ kiraŭnik ofisa prezidenta Ukrainy Andrej Jarmak.
«Rasijanie dumajuć, što im heta dapamoža, ale takija dziejańni padobnyja na ahoniju, — napisaŭ Jarmak. — Nam treba bolš sistem SPA — i jak maha chutčej. U nas niama času na pavolnyja dziejańni. Bolš zbroi dla abarony nieba i źniščeńnia voraha. Tak i budzie».
Bieśpiłotniki nanieśli ŭdary kala centralnaha čyhunačnaha vakzała, heta pryviało da niekalkich pažaraŭ i paškodžańnia žyłych damoŭ.
Kličko napisaŭ, što ŭ vyniku ataki dronaŭ-kamikadze ŭ Šaŭčenkaŭskim rajonie adbyŭsia vybuch u žyłym domie. Vyratavanyja 18 čałaviek. «Pavodle papiaredniaj infarmacyi, dvoje žycharoŭ zastajucca pad zavałami. Vyratavalnyja pracy praciahvajucca. Praciahvajecca tušeńnie razburanych budaŭničych kanstrukcyj i razbor zavałaŭ», — paviedamiŭ mer. Paźniej jon zajaviŭ, što z-pad zavałaŭ dastali cieła zahinułaj žančyny.
Ukrainski prezident Uładzimir Zialenski apublikavaŭ kadry, na jakich bačny hety dom sa značnymi razbureńniami. «Usiu noč i ŭsiu ranicu vorah ładzić teror mirnaha nasielnictva. Droń-kamikadze i rakiety atakujuć ŭsiu Ukrainu. U Kijevie jość trapleńni ŭ žyły dom», — napisaŭ Zialenski ŭ svaim telehram-kanale.