Biełaruskich baskietbalistak adchilili ad adboru da čempijanata Jeŭropy 2023 hoda
Vykanaŭčy kamitet FIBA-Jeŭropa adchiliŭ žanočyja zbornyja Biełarusi i Rasii ad adboračnaha turniru na čempijanat Jeŭropy 2023 hoda, paviedamlaje pres-słužba FIBA.
17.10.2022 / 21:27
Vyniki abiedźviuch kamandaŭ u adpaviednych hrupach buduć pryznanyja niesapraŭdnymi ŭ adpaviednaści ź dziejučymi praviłami.
Biełaruskaja zbornaja lidziravała ŭ hrupie I. U hetaj hrupie hulajuć taksama kamandy Čechii, Niderłandaŭ i Irłandyi. Biełaruś paśpieła vyjhrać na vyjeździe ŭ zbornaj Čechii (66:60) i doma — u zbornaj Niderłandaŭ (83:72).
Žanočy čempijanat Jeŭropy 2023 hoda projdzie z 15 pa 25 červienia ŭ Słavienii i Izraili.
FIBA-Jeŭropa ŭ mai adchiliła pradstaŭnikoŭ Biełarusi ad spabornictvaŭ. Hetak arhanizacyja adreahavała na vajnu, jakuju Rasija viadzie z 24 lutaha va Ukrainie — u tym liku z vykarystańniem terytoryi Biełarusi.