Ź Biełarusi masava rełakujucca nie tolki IT-kampanii, ale i transpartnyja
U vyniku sankcyj, nakładzienych na Biełaruś za saŭdzieł u rasijskaj vajennaj ahresii suprać Ukrainy, pa šlachu rełakacyi byli vymušanyja pajści nie tolki šmatlikija IT-kampanii, ale i pradstaŭniki transpartnaj haliny.
30.10.2022 / 08:46
Biełaruskija transpartnyja kampanii z 6 krasavika nie mohuć pracavać na terytoryi ES. Zabarona dziejničaje ŭžo bolš za paŭhoda i pryviała da taho, što biełaruskija pieravozčyki pačali ŭsio čaściej adkryvać firmy ŭ susiednich krainach Jeŭropy.
Jak paviedamiŭ «Našaj Nivie» čałaviek, jaki nie adzin hod pracuje ŭ śfiery łahistyki, praces adkryćcia firm biełarusami ŭ Jeŭropie nie spyniajecca.
«U Biełarusi i raniej byli bujnyja pieravozčyki, jakija mieli firmy i transpart, zarehistravany nie tolki na terytoryi našaj krainy, ale i ŭ ES. Toje samaje rabili i niekatoryja bujnyja jeŭrapiejskija pieravozčyki, u jakich byli daččynyja kampanii ŭ Biełarusi, Rasii ci Kazachstanie. Tady heta ŭ pieršuju čarhu było źviazana z pytańniami atrymańnia dazvołaŭ na pieravozku. Ciapier pryčyny inšyja, chočaš dastaŭlać hruzy ź Jeŭropy — adkryvaj tam firmu».
Pa słovach surazmoŭcy, mienavita kampanii, jakija ŭžo mieli dziejnyja firmy ŭ Jeŭropie, pieršymi pačali aktyŭna pieravodzić biznes u inšyja krainy, bo im nie treba było marnavać čas na adkryćcio firmy i atrymańnie licenzii. Dastatkova było tolki nabyć dadatkovyja hruzaviki na ŭžo isnujučuju zamiežnuju firmu.
Składaniej ź pierachodam pad jeŭrapiejskija ściahi było tym, kamu daviałosia pačynać biznes u ES z nula. Na adkryćcio firmy i atrymańnie licenzii patrebny čas. U siarednim praces zajmaje 3—4 miesiacy.
Pačatkova na takija kroki navažvalisia bujnyja i siarednija pieravozčyki, pakolki treba było mieć peŭnuju padušku biaśpieki, kab nakiravać siły na kuplu transpartu i adkryćcio firmy ŭ ES. Ciapier ža, pa słovach pieravozčykaŭ, da hetaha prychodziać i drobnyja transpartniki.
«U ludziej zastajecca ŭsio mienš strachu pierad adkryćciom firmy ŭ ES, tamu praces praciahvajecca, bo na rejsach u Rasiju i dalej na ŭschod asabliva nie zarobiš», — pryznajecca pieravozčyk, jaki znachodzicca ŭ pracesie prodažu biełaruskich fur.
Pieravod biznesu pad polskuju firmu davoli chutka akupiŭsia
«Asnoŭnaja prablema — heta nie adkryć firmu ŭ ES i nabyć tam mašyny, a pazbavicca transpartu, zarehistravanaha tut — u Biełarusi. Navat kali mašyna nie znachodzicca ŭ lizinhu, to znajści kupca ciapier davoli składana, bo popyt na taki transpart źniziŭsia», — kaža pieravozčyk.
Inšy surazmoŭca ŭžo całkam pierajšoŭ da pracy pad polskim ściaham. Na pieravod biznesu ŭ Polšču ŭ jaho syšło kala čatyroch miesiacaŭ.
«Rašeńnie vydatkavać čas i hrošy na pieravod biznesu ŭ Polšču davoli chutka akupiłasia, bo taryfy na pieravozku ź ES u RB ciapier vysokija. Aproč hetaha, treba razumieć, što ŭ krainach Jeŭropy sam transpart kaštuje značna tańniej, čym u nas.
Za try busy, pradadzienyja ŭ Biełarusi, u Polščy možna nabyć čatyry-piać anałahičnych mašyn.
Heta jašče adzin plus na karyść pracy tam, bo roźnica ŭ cenach na transpart pakryvaje lišnija vydatki na ŭtrymańnie firmy, adkryćcio licenzii i h.d.», — dzielicca inšy pieravozčyk.
Aproč hetaha, surazmoŭca dadaje, što najaŭnaść firmy, zarehistravanaj u ES, daje mahčymaść pieravozić hruzy nie tolki ź ES u Biełaruś, ale i ŭnutry Jeŭropy.
«Pakul što vyhadniej pracavać mienavita na ŭschodnim kirunku, ale kali raptam zdarycca, što pieravozki ŭ Biełarusi stanuć nie vyhadnymi, to možna budzie rabić pa Jeŭropie».
Polšča, Litva, Łatvija i navat Hruzija
Krychu asabniakom siarod pieravozčykaŭ stajać tyja, chto zajmajecca dastaŭkaj aŭto. U mai biełaruski bok pasłabiŭ kontrsankcyi, kali dazvoliŭ aŭtavozam dastaŭlać hruzy nie tolki da TŁC, a na luby ŭnutrany punkt mytnaha afarmleńnia.
«Amal usie, chto mieŭ aŭtavozy ŭ Biełarusi, chutka pierajšli pad jeŭrapiejskuju jurysdykcyju. Siarod najbolš papularnych kirunkaŭ — adkryćcio firmy ŭ Polščy i Litvie, ale jość i tyja biełarusy, chto ciapier pracuje pad łatvijskim i navat hruzinskim ściahami».
Pa nazirańniach pieravozčyka, bolšaść firm, jakija dastaŭlajuć mašyny ŭ Biełaruś, naležyć mienavita biełarusam. Pa słovach surazmoŭcy, častka jaho kaleh vyrašyli nie zakryvać IP i nie raspradavać biełaruskija hruzaviki, pasprabavaŭšy pieranakiravać ich na pa maršrucie Biełaruś — RF.
«Ale chapaje i tych, kamu ŭdałosia raspradać aŭtapark i całkam likvidavać svaju dziejnaść u Biełarusi», — adznačaje pieravozčyk.
Sankcyi nie dziejničajuć?
Praces rełakacyi transpartnikaŭ za miežy Biełarusi čarhovy raz dakazvaje, što sankcyi dziejničajuć, ale adbyvajecca heta nie adnamomantna, bo šmat dla jakich rečaŭ patrebny čas. Jak i ŭ vypadku z rełakiejtam u IT-śfiery, sychod častki biełaruskich pieravozčykaŭ pad jurysdykcyju inšych krain pryviadzie da taho, što padatki i inšyja adličeńni, jakija raniej pastupali ŭ naš biudžet, — syduć u Polšču, Litvu i inšyja krainy. Dobra, kali ŭłaśniki biznesu zastanucca žyć u Biełarusi i tracić zaroblenyja hrošy ŭnutry krainy, ale horš, kali razam ź biznesam z krainy źjeduć i ludzi.