Жыхара Гомеля асудзілі на чатыры з паловай гады па сямі артыкулах Крымінальнага кодэкса
У закрытым судовым пасяджэнні Гомельскі абласны суд 27 кастрычніка разгледзеў крымінальную справу індывідуальнага прадпрымальніка Сяргея Захаранкі, паведамляе «Вясна».
01.11.2022 / 14:21
Сутнасць абвінавачання праваабаронцам пакуль невядомая.
Сяргей Захаранка прызнаны вінаватым у паклёпе ў дачыненні да Прэзідэнта Рэспублікі Беларусь, які змяшчаўся ў інфармацыі, размешчанай у глабальнай камп'ютарнай сетцы Інтэрнэт, спалучанай з абвінавачваннем у здзяйсненні асабліва цяжкага злачынства; у арганізацыі групавых дзеянняў, якія груба парушаюць грамадскі парадак і спалучаныя з відавочным непадпарадкаваннем законным патрабаванням прадстаўнікоў улады; у публічнай абразе прадстаўніка ўлады ў сувязі з выкананнем ім службовых абавязкаў; у незаконных збіранні і распаўсюдзе звестак аб прыватным жыцці, якія складаюць асабістую таямніцу іншай асобы, без яе згоды; у наўмысных дзеяннях, накіраваных на распальванне нацыянальнай і іншай сацыяльнай варожасці; у іншым садзейнічанні экстрэмісцкай дзейнасці.
Суд прызначыў:
— па ч. 2 арт. 367 Крымінальнага кодэкса — пазбаўленне волі на два гады;
— па ч. 1 арт. 342 Крымінальнага кодэкса — пазбаўленне волі на адзін год;
— па арт. 369 Крымінальнага кодэкса — арышт на тры месяцы;
— па ч. 1 арт. 368 Крымінальнага кодэкса — пазбаўленне волі на адзін год;
— па ч. 1 арт. 179 Крымінальнага кодэкса — арышт на два месяцы;
— па ч. 1 арт. 130 Крымінальнага кодэкса — пазбаўленне волі на чатыры гады;
— па ч. 1 арт. 361-4 Крымінальнага кодэкса — пазбаўленне волі на тры гады.
Канчатковае пакаранне, шляхам частковага складання абвінавачанняў, прызначанае ў выглядзе пазбаўлення волі на тэрмін 4 гады 6 месяцаў з адбываннем у папраўчай калоніі ва ўмовах агульнага рэжыму.
Таксама суд пастанавіў канфіскаваць у даход дзяржавы мабільны тэлефон «iPhone 6s».