Spravazdača EPAM: prybytak vyras, kamanda i vydatki na rełakiejt — skaracilisia
4.11.2022 / 8:47
EPAM pavialičyŭ vyručku i čysty prybytak, ale rezka skaraciŭ vydatki na rełakiejt. Hłabalny štat taksama skaračajecca. Heta vynikaje z finansavaj spravazdačnaści kampanii za treci kvartał, piša Dev.by.
Vyručka
Za lipień-vierasień EPAM atrymaŭ rekordnuju za ŭvieś čas kvartalnuju vyručku — 1,22 miljarda dołaraŭ. U paraŭnańni z trecim kvartałam minułaha hoda vyručka pavialičyłasia na 24%, u paraŭnańni z druhim kvartałam hetaha hoda — amal na 3%.
Vyručka EPAM v 2020-2022 ($ młn)
Sumarna za dzieviać miesiacaŭ vyručka kampanii skłała amal 3,6 miljarda dołaraŭ. Heta ŭsiaho na 160 miljonaŭ dołaraŭ mienš, čym za ŭvieś minuły hod. Adnosna studzienia-vieraśnia 2021 hoda vyručka vyrasła na 35,6%.
Pa vynikach čaćviortaha kvartała EPAM spadziajecca atrymać nie mienš za 1,2 miljarda dołaraŭ. Kali prahnoz spraŭdzicca, hadavaja vyručka kampanii składzie pryblizna 4,8 miljarda dołaraŭ — na miljard bolš, čym letaś.
Prybytak
U druhim kvartale, u tym liku praz kursavyja roźnicy, u EPAM čysty prybytak rezka ŭpaŭ. U trecim kvartale niehatyŭny ŭpłyŭ hetaha faktaru na finansavyja pakazčyki syšoŭ.
Za lipień-vierasień kampanija atrymała prybytak ad kursavych roźnic u pamiery 6,7 miljona dołaraŭ (u trecim kvartale 2021 była strata 3,4 miljona dołaraŭ), a čysty prybytak skłaŭ 156 miljonaŭ dołaraŭ. Heta na 35,6% bolš, čym za toj ža kvartał letaś.
Ale sumarny čysty prybytak EPAM usio jašče adstaje ad letašniaha. Za dzieviać miesiacaŭ jon skłaŭ 264,4 miljona dołaraŭ suprać 339,4 miljona dołaraŭ za taki ž pieryjad 2021.
Dapamoha Ukrainie
EPAM skaraciŭ vydatki ŭ ramkach prahramy humanitarnaj dapamohi Ukrainie, jakaja była zapuščanaja ŭ sakaviku. Za treci kvartał na hetyja mety było vydatkavana 4,5 miljonaŭ dołaraŭ. Dla paraŭnańnia vydatki za druhi kvartał pieravysili 8 miljonaŭ dołaraŭ.
Usiaho ŭ ramkach humanitarnaj dapamohi Ukrainie vydatki EPAM skłali 38,5 miljonaŭ dołaraŭ (sa 100 miljonaŭ dołaraŭ pa prahramie).
Vydatki na rełakacyju
Miarkujučy sa spravazdačnaści, EPAM praciahvaje pieravozić supracoŭnikaŭ u roznyja łakacyi. Ale ŭ trecim kvartale vydatki na rełakiejt rezka ŭpali. Za lipień-vierasień jany skłali ŭsiaho 4,4 miljona dołaraŭ. Heta ŭ 4 razy mienš, čym za pieršy kvartał (19 miljonaŭ dołaraŭ), i ŭ 3 razy mienš, čym za druhi kvartał (14 miljonaŭ dołaraŭ).
Usiaho na rełakacyju sioleta EPAM vydatkavaŭ 37,5 miljonaŭ dołaraŭ.
EPAM nie nazyvaje dakładnaj kolkaści supracoŭnikaŭ, jakija praciahvajuć pracavać u Biełarusi. Taksama nieviadoma, kolki śpiecyjalistaŭ biełaruskaha ofisa kampanii było rełakavana sioleta.
Miž tym na pačatku žniŭnia kiraŭnik EPAM Arkadź Dobkin padzialiŭsia detalami sychodu kampanii z Rasii. Kampanija skaraciła štat u Rasii z 9000+ čałaviek (na kaniec pieršaha kvartała 2022 hoda) da mienš jak 1000 čałaviek. Na kančatkovy sychod patrebny čas, adznačyŭ Dobkin.
Štat
Hłabalny štat EPAM taksama praciahvaje pavoli skaračacca. U kancy vieraśnia ŭ kampanii pracavała 60,3 tysiačy supracoŭnikaŭ. Heta na 14% bolš, čym u kancy vieraśnia minułaha hoda. Ale za treci kvartał ahulny štat EPAM skaraciŭsia na tysiaču čałaviek, abo na 0,2%.
Taksama za lipień-vierasień źniziłasia kolkaść vytvorčych śpiecyjalistaŭ — ad 54,8 da 53,9 tysiačy čałaviek.
Raniej Arkadź Dobkin zajaŭlaŭ, što ŭ kancy hoda EPAM płanuje pamienšyć dolu rehijona (Biełaruś+Ukraina) da 30% ad suśvietnych vytvorčych mahutnaściej (vytvorčaha štatu) kampanii. Uletku jana składała 40% (da pačatku vajny było 60% z ulikam ofisa ŭ Rasii).