Polšča raźmieścić u siabie bazu dla VPS ZŠA
Ułady Polščy pryniali rašeńnie pabudavać u miascovaści Povidz na zachadzie krainy anhary i składy, a taksama paliŭnuju bazu dla amierykanskich vajskoŭcaŭ i viertalotaŭ VPS ZŠA, paviedamlaje vydańnie wnp.pl.
07.11.2022 / 21:06
U hetaj miascovaści, jak zajaviŭ na bryfinhu vice-premjer i ministr abarony krainy Maryjuš Błaščak, raźmieščanaja bajavaja avijacyjnaja bryhada ZŠA, uzbrojenaja ŭdarnymi viertalotami Apache.
«Dla hetych viertalotaŭ na praciahu niekalkich hadoŭ my padrychtujem bazu ŭ vyhladzie anharaŭ i składoŭ, a taksama paliŭnuju bazu, kab viertaloty mahli dziejničać z Povidza», — udakładniŭ Błaščak.
Pavodle słoŭ ministra, Povidz «pieratvarajecca ŭ vajskovy kompleks, rychtujecca padtrymlivać polskija siły i siły NATA na ŭschodnim fłanhu Paŭnočnaatłantyčnaha aljansu». Hetym letam tam pačałosia budaŭnictva składa dla bojeprypasaŭ ZŠA.