U Lidzie aryštoŭvajuć hruzaviki, u jakich na biełym pryčepie — čyrvonaja pałoska
Čytač vydańnia «Zierkało», jaki zajmajecca hruzapieravozkami, paviedamiŭ u redakcyju, što ŭ Lidzie z pačatku 2022 hoda aryštoŭvajuć hruzaviki z pryčepami «BČB-rasfarboŭki» i zatrymlivajuć ich kiroŭcaŭ, a paśla prymušajuć pierafarboŭvać mašynu abo damaloŭvać zialonuju pałosku.
08.11.2022 / 19:35
Fota hruzavikoŭ z łahatypam kampanii «Westavto». Fota ŭziataje z sajta kampanii
«BČB-rasfarboŭkaj» ličycca, pa apisańni čytača Viktara (imia źmieniena), čyrvonaja haryzantalnaja pałasa na biełym fonie. Pavodle jaho słoŭ, jašče ŭ studzieni da niekalkich jaho kaleh-uładalnikaŭ takich pryčepaŭ prychodzili siłaviki, adnaho «chacieli pasadzić na sutki», u druhoha «aryštavali mašynu z hruzam i źmiaścili na štraf-stajanku da suda», skłali pratakoł za adzinočny pikiet.
Surazmoŭca kaža, što tady kiroŭcam takich ciahačoŭ daviałosia zdymać nalepki abo zafarboŭvać ich, a niekatorym supracoŭniki RAUSa «prapanavali prosta dadać zialonuju pałosku».
19 studzienia ŭ instahramie rabotnika dziaržkanała ANT Alaksandra Pleskačova źjaviŭsia post z fota takich hruzavikoŭ — vidać, jak mašyna z takim łahatypam jedzie pa Lidzie, zatym zdymak koła, na jakim staić błakatar. Jość jašče dźvie fatahrafii — na adnoj mužčyna zafarboŭvaje čyrvonuju pałasu biełaj farbaj, a na druhoj (mabyć, heta ŭžo inšaje aŭto) pad čyrvonaj linijaj užo prafarbavanaja zialonaja.
Pryčepy hruzavikoŭ, jakija ich uładalnikam i kiroŭcam daviałosia pierafarboŭvać. Fota: instagram.com/alextvples
U surazmoŭcy «Zierkała» — takaja ž mašyna. Čyrvonuju nalepku ź jaje pryjšłosia źniać, tłumačyć mužčyna. Pavodle jaho słoŭ, DAI ŭ Lidzie ciapier adłoŭlivaje kiroŭcaŭ ź inšych rehijonaŭ, jakija prajazdžajuć pa rajonnych darohach, i stavić hruzaviki pad aryšt. Viktar niadaŭna zaŭvažyŭ takija na stajancy, dzie znachodzicca jahony ciahač.
Jak raskazali «Zierkału» ŭ pravaabarončym centry «Viasna», 3 kastryčnika ŭ Lidzie asudzili mužčynu za «pikietavańnie šlacham vypusku na liniju furhona-refryžeratara ź bieł-čyrvona-biełym ściaham». Jamu dali štraf u 1600 rubloŭ pa č. 1 art. 24.23 KaAP (Parušeńnie paradku arhanizacyi abo praviadzieńnia masavych mierapryjemstvaŭ). Aryšt, jaki raniej byŭ nakładzieny na furhon, sudździa admianiŭ.
Pa słovach surazmoŭcy «Zierkała» Viktara, kiroŭcy, jakich zatrymlivali siłaviki, «jeździli na mašynach ad bresckaj firmy «Viestaŭta». U kampanii sapraŭdy taki łahatyp, ale pieravozčyk pracuje ŭ Biełarusi ŭžo bolš za 25 hadoŭ.
Jak raspavioŭ pradstaŭnik «Viestaŭta», kudy žurnalistka «Zierkała» patelefanavała jak nibyta ŭładalnica padobnaj mašyny, takich hruzavikoŭ u firmy amal nie zastałosia. Raniej, sapraŭdy, staryja pryčepy-refryžaratary byli z čyrvonaj pałasoj na biełym fonie, a ciapier praktyčna ŭsie ich raspradali, i kali niedzie jany jašče jeździać, to heta ŭžo ipešniki, pryvatniki. U firmy va ŭłasnaści takich zastałosia tolki dva. Astatnija pryčepy, pa słovach pradstaŭnika kampanii, — biełyja. Dźvie mašyny z čyrvonymi pałosami nie aryštoŭvali i kiroŭcaŭ nie zatrymlivali, udakładniaje surazmoŭca.
Hruzavik z łahatypam «Viestaŭta» na stajancy. Pa słovach Viktara, mašyna aryštavanaja da suda. Fota čytač dasłaŭ u redakcyju ŭ pačatku listapada 2022 hoda
«Zierkało» patelefanavała taksama ŭ DAI Lidskaha RAUSa i spytałasia, ci možna jeździć na mašynie, nie zdymajučy i nie zafarboŭvajučy čyrvonuju pałasu na biełym fonie. A taksama — što naohuł rabić kiroŭcu takoj mašyny. Pa telefonie adkazali, što heta zaležyć ad taho, «jak pałoski arhanizavanyja, hruba kažučy». Kali mašyna biełaja, a pasiaredzinie — čyrvonaja pałasa, to heta, maŭlaŭ, mohuć rasceńvać jak adzinočny pikiet. Ale kali pałosy naniesienyja daŭno, to, na dumku surazmoŭcy, pytańniaŭ u takim vypadku nie budzie. Asabliva kali jość adpaviednyja dakumienty.
Na pytańnie, ci treba zafarboŭvać liniju, u DAI sucha adkazali, što infarmacyjaj na hety kont nie vałodajuć.