Rasśledavalniki: Siamja Dźmitryja Łukašenki ciesna źviazanaja ź biznesoŭcami, jakija zarabili sotni miljonaŭ dalaraŭ na prodažy BiełAZaŭ
Handlovy dom «BiełAZ», dziaržaŭny manapolny dyler žodzinskaj techniki ŭ Rasii, realizuje jaje praz pryvatnyja kampanii žonak svaich mieniedžaraŭ, źviazanych z Hannaj Łukašenka. Prybytki hetych kampanij paraŭnalnyja z prybytkam samoha «BiełAZa». Z 2017 hoda ich uładalniki vypłacili sabie dyvidendaŭ amal na 100 miljonaŭ dalaraŭ, śćviardžaje Biełaruski rasśledavalnicki centr (BRC) u svaim novym rasśledavańni.
29.11.2022 / 19:27
Dźmitryj Łukašenka z žonkaj i dziećmi
BRC vyśvietliŭ, što jak minimum u 2018 i ŭ 2020 hadach Hanna Łukašenka — žonka siaredniaha syna Alaksandra Łukašenki, Dźmitryja, — pracavała ŭ handlovym domie «BiełAZ». Hetaja firma pradaje techniku žodzinskaha kancerna ŭ Rasii. Siarod zasnavalnikaŭ HD «BiełAZ» — biełaruski «Prezidencki spartovy kłub», jakim kiruje Dźmitryj Łukašenka.
Z 2007 hoda «Prezidencki spartovy kłub» vałodaŭ tracinaj handlovaha doma, ale da 2019-ha hetaja dola vyrasła da 45 %. Astatniaja častka firmy naležyć hałaŭnoj kampanii «BiełAZ».
U «BiełAZa» ad 50% da 90% samazvałaŭ iduć jakraz u Rasiju. Dyleraŭ u Rasii «BiełAZ» ciapier vybiraje praz handlovy dom, jaki amal napałovu naležyć spartyŭnamu kłubu pad kiraŭnictvam Dźmitryja Łukašenki i ŭ jakim jak minimum dva hady pracavała jaho žonka Hanna.
Jak śćviardžaje BRC, dahavory ab pastaŭkach u Rasiju HD «BiełAZ» zaklučyŭ z kampanijami, uładalniki jakich źviazany ź mieniedžmientam dziaržaŭnaha dylera, a taksama blizkija z Hannaj i Dźmitryjem Łukašenkami.
Siabroŭstva pa biznesie abo biznes pa siabroŭstvie?
Usiaho na terytoryi Rasii ŭ HD «BiełAZ» kala dziasiatka partnioraŭ. Najbolš paśpiachovaja kampanija «B-24», saŭładalniki jakoj — Aksana Tačkova i Alena Łahun.
Pieršuju ŭ rasijskaj presie nazyvajuć žonkaj Kanstancina Makarava, dyrektara pa pravavych pytańniach HD «BiełAZ». Druhaja — žonka Viktara Kułujeva, byłoha kiraŭnika rady dyrektaraŭ taho ž handlovaha doma. Ahułam Kułujeŭ z žonkaj vałodajuć dolami jak minimum u čatyroch kampanijach, jakija zajmajucca dystrybucyjaj i servisnym absłuhoŭvańniem žodzinskaj techniki ŭ Rasii.
U 2020 hodzie muž i žonka ŭvajšli ŭ top-10 biełarusaŭ, jakija bolš za ŭsich zarabili ŭ Rasii. Čysty prybytak ich kampanij z 2017 hoda — kala 176 miljonaŭ dalaraŭ, što tolki ŭ dva razy mienš, čym čysty prybytak samoha «BiełAZa». Kala pałovy hetaj sumy ŭładalniki vypłacili sabie ŭ jakaści dyvidendaŭ.
Akramia taho, u 2018 hodzie kampanija Aleny Łahun i Aksany Tačkovaj «B-24» trapiła ŭ top-500 najbujniejšych kampanij Rasii pa vyručcy.
Takija dachody dazvalajuć Kułujevu i Łahun vieści raskošny ład žyćcia. Jak vyśvietliŭ BRC, kampaniju im časta składali Dźmitryj i Hanna Łukašenka. Dziakujučy «Kibierpartyzanam», BRC znajšoŭ u členaŭ dźviuch siemjaŭ 11 sumiesnych pieralotaŭ.
Hieahrafija ich vandrovak była abmiežavanaja: u 2011 hodzie z-za padaŭleńnia paślavybarnych pratestaŭ Dźmitryj Łukašenka patrapiŭ pad jeŭrapiejskija sankcyi. Kułujeŭ i nadalej lataŭ u ES z žonkaj Dźmitryja — Hannaj Łukašenka. U 2011 hodzie jany razam naviedali Vienu i Frankfurt.
U 2013 hodzie siemji adpravilisia ŭ padarožža ŭžo ŭ poŭnym składzie: Dźmitryj i Hanna Łukašenka ź dziećmi i Kułujeŭ z žonkaj i dziciem. 22 sakavika jany na pryvatnym biznes-džecie vylecieli ź Minska ŭ Stambuł.
Tam Dźmitryj Łukašenka adznačyŭ svajo 33-hodździe. U Turcyi kampanija praviała 9 dzion.
U Stambuł na dzień naradžeńnia Dźmitryja ŭ 2013 hodzie latała i jašče adna hierainia rasśledavańnia BRC — Taćciana Kułakova, siastra Hanny Łukašenka.
Jana aktyŭnaja ŭdzielnica praŭładnych aŭtaprabiehaŭ i namieśnica kiraŭnika pradziusarskaha centra «Muzyčnaja miedyjakampanija». Vałodajuć «Muzyčnaj miedyjakampanijaj» Pałac Respubliki, kiraŭnictva spraŭ Łukašenki i firma «ANSŁ pradakšn».
Svajho syna Taćciana Kułakova letaś pieraviała ŭ Minskuju mižnarodnuju himnaziju, jakuju, jak my vyśvietlili ŭ adnym z našych rasśledavańniaŭ, zasnavała Iryna Abielskaja za hrošy aliharcha Michaiła Huceryjeva.
U hetaj pryvatnaj škole niedaloka ad Drazdoŭ vučacca ŭ asnoŭnym dzieci biznesoŭcaŭ i nabližanych da Łukašenki.
Na šyrokuju nahu
Taćciana Kułakova niaredka supravadžaje siastru ŭ jaje padarožžach. Čaściej za ŭsio Hanna Łukašenka adpačyvaje ŭ Jeŭropie, pryčym zusim nie na biudžetnych kurortach.
U studzieni 2017 hoda Hanna na ŭradavym borcie adpraviłasia ŭ aŭstryjski Insbruk katacca na łyžach. U samalocie była ŭsia jaje siamja, u tym liku maci i siastra z mužam.
Kali b Hańnie pryjšłosia samoj kupić bilety ŭ Insbruk dla ŭsioj kampanii i prafinansavać hety adpačynak, to dziesiacidzionnaja pajezdka abyšłasia b joj minimum u 100 tysiač dalaraŭ. Častku sumy ŭdałosia zekanomić dziakujučy ŭradavamu bortu, jaki absłuhoŭvajecca za biudžetnyja hrošy.
Uletku taho ž hoda Hanna Łukašenka zaprasiła blizkich adznačyć jaje dzień naradžeńnia ŭ Italii. Na pryvatnym džecie kampanija z 11 čałaviek adpraviłasia ŭ Kaljary na cełych 25 dzion.
Košty na adzin palot takoha džeta startujuć ad 38 tysiač jeŭra. Kali ŭličyć traty na žyllo i zvarotnuju darohu, a taksama minimalnyja vydatki amal na miesiačny adpačynak, to siamja Hanny, pa ścipłych acenkach, pavinna była vyłučyć na vandravańnie nie mieniej 150 tysiač dalaraŭ. Niaścipłaja acenka takoha adpačynku moža dachodzić da miljona dalaraŭ.
U kastryčniku taho ž 2017 hoda Hanna znoŭ karystałasia ŭradavym samalotam. Na im jana z mužam, dziećmi i siastroj na dzieviać dzion palacieła ŭ Dochu.
U dzień viartańnia ŭ Biełaruś Taćciana Kułakova apublikavała fatahrafiju sa stalicy Katara, adznačyŭšy piacizorkavy hatel Banana Island Resort Doha by Anantara .
Adna noč u hetym miescy ź dziećmi abychodzicca ŭ siarednim ad dźviuch da piaci tysiač dalaraŭ. Takim čynam, kampanija Hanny Łukašenka tolki na žyllo vydatkavała kala paŭsotni tysiač dalaraŭ. A ŭsie try vodpuski ŭ 2017 hodzie abyšlisia Hańnie i jaje spadarožnikam u 350 tysiač dalaraŭ, pa minimalnych padlikach.
BRC nazyvaje i inšyja šmatlikija padarožžy Hanny Łukašenka, jakija nie suadnosiacca ni ź jaje aficyjnym zarobkam, ni z zarpłataj jaje muža Dźmitryja ŭ «Prezidenckim spartovym kłubie», jahonym adzinym aficyjnym miescy pracy (za 2016 hod, naprykład, jon aficyjna zarabiŭ kala 30 tysiač dalaraŭ).
Časam, pavodle BRC, kampaniju sužencam Łukašenkam składali viadomyja biznesmieny. Siarod spadarožnikaŭ Hanny i Dźmitryja Łukašenki byli nie tolki biełaruskija biznesmieny. Padarožžy na kurorty z hetaj siamiejnaj paraj padzialali, naprykład, pradstaŭniki słavienskaj kampanii Riko, jakaja mieła biznes-zacikaŭleńni ŭ Biełarusi.