Jak pracuje ŭkaz Łukašenki ab uzakońvańni ŭ sproščanym paradku pabudoŭ, uźviedzienych biez dazvołu
U Biełarusi ŭžo try miesiacy pracuje ŭkaz Łukašenki «Ab sproščanym paradku pryjomki ŭ ekspłuatacyju abjektaŭ budaŭnictva», pa jakim možna ŭzakonić pabudovu, uźviedzienuju biez dazvołu i biez prajektnaj dakumientacyi. Ab praktyčnych niuansach hetaha pracesu raskazaŭ načalnik upraŭleńnia architektury i budaŭnictva Minskaha rajvykankama Raman Varaŭka ŭ intervju sajtu Prystalica.by.
05.12.2022 / 19:04
Fota ilustracyjnaje
«Minski rajvykankam moža prymać u ekspłuatacyju budynki na ziamielnych nadziełach, vydadzienych da 1 vieraśnia 2022 hoda», — raskazaŭ Raman Varaŭka. U jahonym Minskim rajonie takich budynkaŭ było 535, da ciapierašniaha času ŭžo ŭzakonili 233.
Varaŭka adznačyŭ, što ŭłaśnikam treba zdavać usie dakumienty nie ŭ «adno akno», a va ŭpraŭleńnie architektury i budaŭnictva vykankama. Pracedura pavinna być praviedziena na praciahu miesiaca. Sam ukaz nosić časovy charaktar i dziejničaje da 1 studzienia 2025 hoda.
Akramia zajavy, uładalniki pavinny padać dakumienty, jakija pacviardžajuć prava karystańnia ziamielnym učastkam i viedamaść techničnych charaktarystyk na kapitalnyja pabudovy. U samoj zajavie treba zaśviedčyć zhodu paŭnaletnich hramadzian, jakija majuć prava vałodańnia i karystańnia hetym budynkam.
Čynoŭnik źviarnuŭ uvahu, što pabudova pavinna raźmiaščacca na adpaviednaj adlehłaści ad miažy susiedskaha ŭčastka. Kali jość adchileńni pa adlehłaści pamiž susiedziami, daviadziecca prynieści nataryjalna zavieranuju zhodu inšaha ziemlekarystalnika.
Akramia taho, va ŭkazie dakładna ahavorana, što budynak pavinien adnosicca da 5-ha kłasa składanaści. Heta aznačaje, što haspadarčaja pabudova musić być adnapaviarchovaj.