На заметку беларускаму Архімэду
левым вокам
Касьмічныя прыгоды «БелКА» адкрылі ў грамадзтве дыскусію: куды накіраваць розумы нашых вучоных – у космас, на службу мірнаму атаму, а можа… Фэльетон Лёліка Ушкіна.
03.08.2006 / 20:43
Касьмічныя прыгоды «БелКА» адкрылі ў грамадзтве дыскусію: куды накіраваць розумы нашых вучоных – у космас, на службу мірнаму атаму, а можа… Фэльетон Лёліка Ушкіна.
Уважліва прачытаўшы Ягоны апошні сьпіч перад дыпляматамі, зразумеў, што нам патрэбна абсалютна новае пакаленьне прылад і тэхналёгій, якія маглі б служыць нашым сапраўдным інтарэсам. Нават уявіў дыялёг у беларускім павільёне на нейкай навуковай выставе:
— Добры дзень, тут прадстаўлены апошнія навінкі беларускай навукі?
— Вэлком, гутэн таг, добры дзень! Магу прапанаваць вам некалькі эксклюзіўных распрацовак. Вось, напрыклад, «замежнапалітычны прагматызатар»
— Гэта ж пыласос!
— Самі вы пыласос! Прылада пабудавана на прынцыпе залежнасьці замежнай палітыкі ад інтэнсіўнасці патокаў нэйтронаў і пратонаў. Уключаем прагматызатар у сетку. Адчуваеце, як прагматызуецца ваша замежная палітыка ў радыюсе двух мэтраў? Можна паставіць на максымум – дзесяць мэтраў. На жаль, гэта пакуль усё, аднак экспэрымэнты працягваюцца.
— Добра, а вось там што? Хакейныя наплечнікі?
— Гэта «палітычны гібкатар» – накладаецца вось так на плечы. Калі нехта спрабуе паляпаць вас па плячы, б’е токам, ілюструючы словы Бацькі: «Мы нічога не рабілі дзеля паляпваньня па плячы». Пагадзіцеся, вельмі зручна.
Ідзём далей. Ага! «Антынацкоўшчык» Гэта спэцыяльна для сустрэчаў з грамадзянамі СНД, каб, гаворачы Яго словамі, ня даць «нацкаваць друг на друга». Рэч накшталт намордніка. Глядзіце, я надзеў яго, і цяпер, нават калі вы будзеце прадаваць мне газ па 200 баксаў, мяне на вас не нацкаваць. Ну што, выпісваць?
— Не, дзякуй.
— Ну, тады выключна для вас «геапалітычны зацікаўлівач»: шляхам шматлікіх экспэрымэнтаў даказана, што, калі ў такім скафандры і такіх ластах прыйсьці на дыпляматычны раўт, вамі зацікавяцца ўсе прысутныя. Гэта ня ўсё: калі вы набываеце геапалітычны зацікаўлівач, то кампанія-вытворца дае вам у падарунак прыладу – «антыдвухстандартны адэкватар». Вось бачыце гэтую пімпачку? Яна называецца «наша пазыцыя па пытаньнях двухбаковага супрацоўніцтва у гандлёвай і транзытна-транспартнай сфэрах». Калі круціць вось гэтую ручку, яна адэкватна падкарэктуецца. Пагадзіцеся, супэр.
Пачакайце, куды вы?.. Я ж яшчэ не паказаў вам «фарміравальнік пазытыўнага іміджу», пабудаваны паводле прынцыпу кававаркі! Дзівак!.. Што сказаць – застаўся ў мінулым стагодзьдзі.