Demanstracyja pratatypa «pieršaj ŭ śviecie štučnaj matki» vyklikała abureńnie
EctoLife — futurystyčnaja kancepcyja, jakaja prapanuje baćkam «vyrablać» niemaŭlat z dapamohaj štučnych matak. «Elitny pakiet» dazvolić ludziam vybirać uzrovień intelektu svajho dziciaci, rost, koler vałasoŭ, vačej, fizičnuju siłu i navat ton skury.
18.12.2022 / 18:56
Vyjava: Youtube-videa «EctoLife: The World's First Artificial Womb Facility»
Hetaje videa padobnaje da sceny z «Matrycy»: šerahi niemaŭlataŭ, jakija naradžajucca ŭ «pieršym u śviecie prystasavańni — štučnaj matcy», — jaki, jak miarkujecca, moža inkubavać da 30 000 dziaciej u hod. Kancepcyja źjaŭlajecca tvoram Chašema Al-Hajli, pradziusara, režysiora i «malekularnaha bijołaha pa prafiesii», jak paviedamlajecca na jaho sajcie.
U zadumie aŭtara, piša Firstpost, baćki mohuć sačyć za rostam i raźvićciom svajho dziciaci praz ekrany, jakija pakazvajuć danyja ŭ režymie realnaha času, i ich možna kantralavać z dapamohaj dadatku na telefonie. «Sistema, zasnavanaja na štučnym intelekcie, taksama adsočvaje fizičnyja asablivaści vašaha dziciaci i paviedamlaje pra lubyja patencyjnyja hienietyčnyja adchileńni», — kaža Al-Hajli. Padčas «rodaŭ» dzicia možna dastać z kapsuły prostym «naciskańniem knopki».
Al-Hajli ličyć, što štučnaja matka moža stać realnaściu praz 10 hadoŭ, kali etyčnyja abmiežavańni buduć źniatyja. Jon kaža, što kožnaja asablivaść, zhadanaja ŭ kancepcyi, na 100 adsotkaŭ navukova abhruntavanaja i ŭžo dasiahnutaja navukoŭcami i inžynierami.
«Elitny pakiet»
«Elitny pakiet» dazvolić ludziam «hienietyčna raspracavać» embryjon pierad impłantacyjaj jaho ŭ štučnaje ŭłońnie.
Baćki mohuć vybrać uzrovień intelektu svajho dziciaci, rost, vałasy, koler vačej, fizičnuju siłu i koler skury.
«Dziakujučy instrumientu redahavańnia hienaŭ CRISPR-Cas 9, vy možacie redahavać lubuju rysu vašaha dziciaci z dapamohaj šyrokaha dyjapazonu z bolš čym 300 hienaŭ», — havorycca ŭ zajavie.
Patreba ŭ štučnaj matcy
Al-Hajli śćviardžaje, što štučnaja matka moža «dapamahčy» krainam, jakija sutyknulisia z prablemaj źmianšeńnia nasielnictva, takim, jak Japonija, Bałharyja i Paŭdniovaja Kareja, siarod inšych, i daść baćkam mahčymaść mieć dziaciej bieź ciažarnaści ci navat začaćcia. Jana taksama nakiravanaja na toje, kab biaspłodnyja pary mieli mahčymaść stać baćkami ŭłasnych bijałahičnych naščadkaŭ. Aŭtar kancepcyi ličyć, što hetaja technałohija moža stać rašeńniem dla žančyn, jakim vydalili matku z-za raku abo inšych faktaraŭ.
Što kažuć śpiecyjalisty
Ekśpierty ličać, što technałohija nie takaja ŭžo i nadumanaja i moža stać realnaściu ŭ blizkaj budučyni.
Endru Šenan, prafiesar akušerstva Karaleŭskaha kaledža Łondana, kaža: «Z tearetyčnaha punktu hledžańnia heta mahčyma. Heta prosta pytańnie zabieśpiačeńnia naležnaha asiarodździa z palivam i kisłarodam, i ja sapraŭdy dumaju, što technałohii jość, kab možna było dasiahnuć hetaha». Jon dadaŭ, što, kali sprava dachodzić da antyciełaŭ, jakija pieradajucca ad maci da niemaŭlaci, adbyvajucca «raznastajnyja bijachimičnyja i imunałahičnyja rečy, jakija my, napeŭna, jašče nie razumiejem», dadaŭšy, što heta patrabuje dadatkovych daśledavańniaŭ.
Prafiesar Džojs Charpier, kiraŭnik hrupy repraduktyŭnych navuk i hramadstva Instytuta žanočaha zdaroŭja UCL, kaža: «Ja nie sumniajusia, što ŭ niejki momant bolšaść ludziej buduć naradžacca šlacham EKA. I što heta [EctoLife] budzie mahčyma. U navucy, ja dumaju, nikoli nie treba kazać nikoli».
Prafiesar Charpier ličyć, što budučyja pakaleńni buduć mienš turbavać etyčnyja pytańni. «Moładź nie maje tych vahańniaŭ, jakija jość u nas», — kaža jana.
Vyjava: Youtube-videa «EctoLife: The World's First Artificial Womb Facility»
Jana dumaje, što technałohija pryjdzie, ale sapraŭdnaje pytańnie, jakoje varta zadać, palahaje ŭ tym, ci chočuć ludzi, kab takoje było? «Ja nie sumniajusia, što ŭ budučyni navuka zdoleje stvaryć štučny anałah matki čałavieka, ale pakul jość šmat techničnych i sacyjalnych prablem, jakija my pavinny pieraadoleć», — kaža prafiesar Charpier.
Prafiesar Šenan u svaju čarhu ličyć, što hetyja etyčnyja bitvy byli ŭ značnaj stupieni vyčarpanyja paśla źjaŭleńnia EKA. «Kali dzieci z prabirki źjavilisia ŭpieršyniu, byli vialikija debaty i admovy, ale ciapier dzicia z prabirki šyroka pryznanaje, — kaža jon. — Surahatnaje maciarynstva ciapier taksama vielmi raspaŭsiudžanaja źjava. U peŭnym sensie vy prosta prosicie stać surahatam mašynu, a nie inšuju žančynu».
Adnak mnohija asudžajuć taki padychod z punktu hledžańnia etyki. Ci nie pryviadzie heta da masavaj «vytvorčaści» ludziej dla patreb pramysłovaści ci armii, asabliva ŭ tatalitarnych dziaržavach? Ci nie vykliča heta «źniečałaviečvańnie čałavieka»?