Playtika za adzin dzień skaraciła ofisy ŭ Minsku i Varšavie
12 śniežnia ŭ ofisach pa ŭsim śviecie hiejmdeŭ-kampanii Playtika prajšli skaračeńni. Zachodnija miedyja pisali, što kampanija zvolniła 15% štatu — kala 610 čałaviek. Supracoŭniki minskaha i varšaŭskaha ofisaŭ padzialilisia z dev.by padrabiaznaściami.
15.12.2022 / 08:53
— Usia chvala zvalnieńniaŭ prajšła za adzin dzień (u paniadziełak). Pad skaračeńnie trapili ŭsie: zvyčajnyja supracoŭniki, dyrektary studyj, top-mieniedžmient. U ofisie panavała poŭnaja niavyznačanaść, usie byli ŭ stresavym stanie: nichto nie viedaŭ, kamu mohuć zabłakavać kampjutar i paklikać na razmovu. Zvalniali va ŭsich łakacyjach, u tym liku ŭ štab-kvatery Playtika ŭ Izraili. Ciapier — u aŭtorak — usie bolš-mienš supakoilisia. Mieniedžary kažuć, što druhoj chvali zvalnieńniaŭ nie budzie, — raskazvaje supracoŭnik varšaŭskaha ofisa.
U 2021—2022 hadach Playtika pieraviezła mnohich supracoŭnikaŭ ź Minska ŭ Varšavu. Izrailskija miedyja pisali pra 300 rełakantaŭ, i heta pałova štatu Playtika ŭ Biełarusi da 2021 hoda. Krynica dev.by nazyvaje varšaŭski ofis «bekapam minskaha» i adznačaje, što paśla pačatku vajny kampanija pieraviezła ŭ Varšavu i mnohich ukrainskich ajcišnikaŭ.
Dakładnuju kolkaść zvolnienych u varšaŭskim ofisie jon nazvać nie zmoh. Pavodle jaho acenak, da skaračeńniaŭ tam pracavała kala 550 čałaviek.
Pracaŭniki jak varšaŭskaha, tak i minskaha ofisaŭ kažuć, što zvalnieńni stali dla ich poŭnaj niečakanaściu.
Chronika padziej u minskim ofisie (sa słoŭ vidavočcy):
- 9 śniežnia pra zvalnieńni paviedamili mieniedžmientu, vyšejšamu za samaje nižniaje źviano (mieniedžary kamand/prajektaŭ — «hrup-mieniedžary» pavodle ŭnutranaj kłasifikacyi). U hety ž čas pačali źjaŭlacca insajdy na anhłamoŭnych resursach.
- U subotu, 10 śniežnia, nizavoje źviano mieniedžaraŭ publikuje infarmacyju ŭ Teams pra važny mitynh u paniadziełak, da jakoha ŭsim treba padłučycca.
- Ranicaj u paniadziełak, 12 śniežnia, mieniedžary siaredniaha źviana prosiać «ščaśliŭčykaŭ» pryjechać u ofis. Padrabiaznaściej pa-raniejšamu niama, kalehi repościać insajdy z anhłamoŭnych resursaŭ. Na ranišnich dejlikach kamandam nahadvajuć pra važny mitynh.
- U 14:30 pačynajecca mitynh. Videazapis, na jakim SIEO abjaŭlaje pra składanaje rašeńnie skaracić kala 15% štatu: «Nam vielmi škada, ale heta biznes, vy ciapier častka historyi».
- A 15-j paviedamlajuć, što dziela biaśpieki ŭsim błakujuć dostup da karparatyŭnych resursaŭ.
- Ad 15:30 i da viečara paniadziełka prachodziać karotkija mitynhi z łakalnymi (minskimi/kijeŭskimi/varšaŭskimi) kiraŭnikami departamientaŭ. U Minsku supracoŭnikam (jakija trapili pad skaračeńnie) abviaščajuć, što kantrakty padaŭžacca nie buduć (zakančvajucca pry kancy lutaha). Ciaham niekalkich dzion pracaŭnikam prapanujuć zdać abstalavańnie. Prośby darabić biahučyja zadačy adchilajucca.
- Padpisvajecca pahadnieńnie: supracoŭniki pavinny trymać u tajamnicy lubyja ŭmovy zvalnieńnia i abaraniać reputacyju najmalnika. Nie padpišaš — pazbavišsia kampiensacyi.
- Niekatorym supracoŭnikam prapanujuć pieravod u inšuju kamandu/departamient — biez alternatyŭnaha varyjanta. Niekatorym prapanujuć pačakać pieravodu peŭny čas abo zvalniacca.
- Dla mnohich usio heta stała poŭnaj niečakanaściu. Pracaŭniki nie mohuć zrazumieć ałharytmu zvalnieńniaŭ.
- Zvalnieńnie farmalna maje adbycca 28 lutaha — paśla zaviaršeńnia kantrakta. Tady ž zvolnienym addaduć pracoŭnyja knižki.
- Zvalniali i inžynieraŭ, i architektaraŭ, i biznes-analitykaŭ, i sisadminaŭ, i saport, i mieniedžaraŭ roznaha źviana.
Krynicy dev.by paviedamili, što Playtika raspuściła ŭnutranuju studyju Jelly Button, skaraciła kamandy hulniaŭ Board Kings i Bingo. Taksama Playtika spyniła supracoŭnictva ź biełaruskaj kampanijaj Sababa Labs, z kamandami jakoj pracavała na aŭtsorsie.
Krynicy dev.by paviedamili, što Playtika prapanavała niadrennyja bonusy zvolnienym supracoŭnikam: kampiensacyja ŭ pamiery akładu za niekalki miesiacaŭ, vypłata hadavoha bonusu.
Z aficyjnaha sajta Playtika źnikli amal usie vakansii va ŭsich łakacyjach. Da skaračeńniaŭ va ŭsich ofisach kampanii pracavała kala 4100 čałaviek.
Tryvožnyja naviny z Playtika pačali pastupać pry kancy 2021 hoda. Letaś u listapadzie inviestary pačali rasśledavańnie suprać kampanii paśla niečakanaha abvału akcyj. Uletku 2022-ha stała viadoma pra pieršyja surjoznyja skaračeńni: Playtika była hatovaja zvolnić 250 čałaviek i zakryć studyi ŭ Manreali, Łos-Andželesie i Łondanie. U listapadzie taki ž los napatkaŭ studyju ŭ Chielsinki. Miedyja źviazvali skaračeńni ź niehatyŭnym upłyvam na hulniavuju industryju takich faktaraŭ, jak vysokija pracentnyja staŭki ŭ zachodnich krainach, vysokaja inflacyja i adnaŭleńnie ekanomiki paśla pandemii (padčas jakoj aŭdytoryja mabilnych hulniaŭ, naadvarot, rasła).
Studyi mabilnaha hiejmdevu z ofisami ŭ Biełarusi pieražyvajuć składanyja časy. Na pačatku leta stała viadoma pra zvalnieńni ŭ WannaPlay i Playgendary. Playrix spačatku skaraciła štat, a zatym zakryła ofisy ŭ Biełarusi i Rasii.