Hetaj zimoj da hrypu moža dałučycca streptakok
Sistemy achovy zdaroŭja ŭ ZŠA i Vialikabrytanii vyvučajuć mahčymy rost vypadkaŭ bakteryjalnych infiekcyj streptakoka A siarod dziaciej. Hetaja reśpiratornaja infiekcyja šyroka raspaŭsiudziłasia napiaredadni śviat, paviedamlaje The Wall Street Journal.
22.12.2022 / 20:46
Fota: Unsplash
Rańni ŭsplosk zvyčajnych reśpiratornych virusaŭ, u tym liku reśpiratorna-sincytyjalnaha virusa (abo RSV) i hrypu, u apošnija tydni nazirajecca ŭ škołach i balnicach roznych krain Jeŭropy i Paŭnočnaj Amieryki. Adna z pryčyn takoha ŭsplosku — u tym, što ŭsio bolš ludziej źbirajecca ŭ pamiaškańniach bieź mier zaściarohi, u pryvatnaści, biez masak, jakija vykarystoŭvali ŭ časie pandemii COVID-19.
Pradstaŭniki achovy zdaroŭja Vialikabrytanii i Suśvietnaja arhanizacyja achovy zdaroŭja zajavili, što atrymali paviedamleńni ab pavieličeńni kolkaści invazijnych streptakokavych infiekcyj i pavieličeńni kolkaści śmierciaŭ u niekatorych miaścinach, pryčym čaściej za ŭsio pakutujuć dzieci da 10 hadoŭ. Aficyjnyja asoby Vialikabrytanii zajavili, što kolkaść zarehistravanych vypadkaŭ surjoznych zachvorvańniaŭ, vyklikanych streptakokavaj bakteryjaj A, bolšaja, čym čakałasia ŭ hety čas hoda. U Vialikabrytanii zarehistravana kala 74 śmierciaŭ, u tym liku 16 siarod dziaciej.
«Heta pa-raniejšamu niašmat, ale pa miery taho, jak usio bolš ludziej chvareje na streptakok, vy ŭbačycie, što ŭ mnohich ludziej mohuć być surjoznyja ŭskładnieńni, źviazanyja z hetaj infiekcyjaj», — kaža Piter Čyn Chonh, śpiecyjalist pa infiekcyjnych zachvorvańniach Kalifarnijskaha ŭniviersiteta ŭ San-Francyska.
Bakteryi, jakija nazyvajuć streptakokam hrupy A, — davoli raspaŭsiudžanyja i mohuć vyklikać šerah zachvorvańniaŭ, u tym liku anhinu, škarlatynu i zachvorvańnie skury — impietyha. Infiekcyi raspaŭsiudžvajucca ŭ asnoŭnym praz dychalnyja šlachi abo padčas niepasrednaha kantaktu, naprykład, padčas ježy z adnoj talerki.
U asnoŭnym infiekcyi praciakajuć lohka, i ich možna lačyć antybijotykami. Adnak bolš redkija invazijnyja streptakokavyja infiekcyi byvajuć ahresiŭnymi, bo bakteryi mohuć pranikać u kryvianosnuju sistemu i vyklikać surjoznyja ŭskładnieńni, u tym liku pnieŭmaniju, sindrom taksičnaha šoku i niekratyčny fascyit, jaki jašče nazyvajuć «chvarobaj, što źjadaje cieła».
Ad 14 000 da 25 000 vypadkaŭ bolš surjoznaj, invazijnaj streptakokavaj infiekcyi nazirałasia za apošnija piać hadoŭ u ZŠA štohod i štohod rehistravałasia ad 1 500 da 2 300 śmierciaŭ. Amierykanski Centr pa kantroli i prafiłaktycy zachvorvańniaŭ nie adsočvaje bolš lohkija, nieinvazijnyja streptakokavyja infiekcyi.
Na minułym tydni Suśvietnaja arhanizacyja achovy zdaroŭja zajaviła, što jana atrymała paviedamleńni jak minimum ź piaci krain, siarod jakich Francyja, Šviecyja i Niderłandy, pra ŭmieranaje pavieličeńnie kolkaści vypadkaŭ invazijnaha streptakoka A. Paviedamleńniaŭ pra novyja štamy bakteryj abo pavyšeńnie ŭstojlivaści da antybijotykaŭ nie pastupała, paviedamiła SAAZ, — heta dało arhanizacyi padstavu mierkavać, što ryzyka dla nasielnictva ŭ cełym davoli nizkaja.
Centr pa kantroli i prafiłaktycy zachvorvańniaŭ vyvučaje mahčymy rost kolkaści infiekcyj siarod dziaciej u ZŠA. Baćki pavinny pierakanacca, što ŭ dziaciej zroblenyja pryščepki ad hrypu i vietranaj vospy, bo hetyja chvaroby taksama pavialičvajuć ryzyku zaražeńnia streptakokam A. Baćkam varta viedać, jak vyhladajuć simptomy niekratyčnaha fascyitu i sindromu taksičnaha šoku, i nieadkładna źviarnucca pa miedycynskuju dapamohu, kali jany ličać, što ŭ ich dziciaci adna z hetych infiekcyj.
Faktary, što spryjajuć patencyjnamu ŭzdymu surjoznych vypadkaŭ streptakoka A, mohuć uklučać źnižeńnie ahulnaha imunitetu ŭ nasielnictva paśla taho, jak miery zaściarohi ad COVID-19 praduchilili raspaŭsiudžvańnie inšych reśpiratornych infiekcyj, kažuć ekśpierty pa infiekcyjnych zachvorvańniach. Rańni rost kolkaści vypadkaŭ hrypu taksama moža spryjać tamu, što zaražeńnie hrypam pavialičyć ryzyku bakteryjalnych infiekcyj, u tym liku streptakokaŭ.
«Niekatoryja ludzi buduć bolš usprymalnyja da takich bakteryj, jak streptakok, mienavita paśla taho, jak zachvareli na hryp», — adznačaje doktar Čyn Chonh.