Chłopca asudzili za ŭdzieł u pratestach da «chatniaj chimii». U jakaści dokazaŭ viny — videa z kamier nazirańnia i detalizacyja telefonnych razmoŭ
U sudzie Žłobinskaha rajona asudzili Mikitu Bohuša pavodle č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich) Kryminalnaha kodeksa. Suddzia Jaŭhienij Jerafiejeŭ pryznačyŭ Mikitu dva hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniuju chimiju»), paviedamlaje «Viasna».
03.01.2023 / 16:27
Pratesty ŭ Žłobinie ŭ žniŭni 2020 hoda
Mikita — student 1-ha kursa adnoj z homielskich VNU. Jaho zatrymali 23 žniŭnia 2022 hoda. Chłopca abvinavacili ŭ tym, što jon 9 žniŭnia 2020 hoda ŭ centry Žłobina ŭziaŭ udzieł u akcyi pratestu suprać vynikaŭ prezidenckich vybaraŭ. Sud rascaniŭ heta jak «udzieł u hrupavych dziejańniach, jakija hruba parušajuć hramadski paradak». Taksama Mikitu pastavili ŭ vinu «naŭmysnuju pieraškodu ruchu hramadskaha transpartu». Mikita razam ź inšymi ŭdzielnikami akcyii «plaskali ŭ dałoni, hučna kryčali, śviścieli, vykrykvali roznyja łozunhi».
Na pracesie apytali śviedkaŭ, siarod jakich była maci Mikity. Padčas śledstva joj pakazali videazapis z pratestaŭ, na jakim jana paznała svajho syna.
Mikita całkam pryznaŭ vinu i raskajaŭsia ŭ ździejśnienym.
Siarod materyjałaŭ spravy byŭ «pratakoł ahladu pradmietaŭ ad 9 kastryčnika 2020 hoda z tablicaj fotazdymkaŭ da jaho».
Pavodle zhadanaha pratakoła ahladu, padčas śledstva byli prahledžanyja:
— videafajły z AUS Žłobinskaha rajvykankama;
— videafajły z mabilnaha telefona, kanfiskavanaha 11 žniŭnia 2020 hoda ŭ niejkaha «K»;
— zapisy kamiery nazirańnia z adnoj z vulic Žłobina, jakija byli zabranyja ŭ ŽEU №3 Žłobina;
Da materyjałaŭ spravy dałučanyja «pratakoły ahladu pradmietaŭ» ad 15 listapada 2020-ha i 26 studzienia 2021-ha, taksama z tablicami fotazdymkaŭ. U nazvanych pratakołach siłaviki analizujuć žnivieńskija paviedamleńni ŭ telehram-kanale Nexta i žłobinski čat u telehramie. U ich jany znajšli «paviedamleńni ab zaklikach da masavych biesparadkaŭ ź instrukcyjami da dziejańniaŭ».
Mabilny apieratar «A1» pieradaŭ siłavikam CD-dysk z detalizacyjaj razmoŭ Mikity Bohuša. Z dapamohaj hetaj infarmacyi stała mahčyma vyśvietlić miescaznachodžańnie Mikity padčas pratestaŭ 9 žniŭnia 2020 hoda.