На цырымоніі ўручэння «Залатых глобусаў» прагучала заява Зяленскага
Падчас юбілейнай 80-й цырымоніі ўручэння ўзнагарод «Залаты глобус» (яе лічаць другой па прэстыжнасці ў Галівудзе пасля «Оскара») прагучала відэазаява прэзідэнта Украіны Уладзіміра Зяленскага.
11.01.2023 / 08:31
Фота: Jacquelyn Martin / AP Photo
Яго прадставіў акцёр Шон Пэн, які неаднаразова быў ва Украіне пасля пачатку поўнамаштабнай вайны і нават прывёз Зяленскаму ў Кіеў свой «Оскар».
Зяленскі нагадаў, што «Залатыя глобусы» пачалі ўручаць падчас Другой сусветнай вайны, у 1943 годзе. Ён заявіў, што бітва Украіны супраць расійскага ўварвання сімвалізуе «барацьбу за правы новага пакалення, якое ведала пра вайну толькі з кіно».
«У Першай сусветнай вайне загінулі мільёны людзей. Другая сусветная вайна загубіла дзясяткі мільёнаў. Трэцяй сусветнай вайны не будзе. Гэта не трылогія», — сказаў Зяленскі.
Ён дадаў, што Украіна спыніць расійскую агрэсію з дапамогай дэмакратычных краін свету.
«Вайна ў Украіне пакуль не скончана, але ў ёй надыходзіць пералом, і ўжо зразумела, хто пераможа. Мы зробім гэта разам з усім вольным светам, і я спадзяюся, што ўсе вы будзеце з намі ў гэты пераможны дзень, дзень нашай перамогі», — сказаў Зяленскі.