Na cyrymonii ŭručeńnia «Załatych hłobusaŭ» prahučała zajava Zialenskaha
Padčas jubilejnaj 80-j cyrymonii ŭručeńnia ŭznaharod «Załaty hłobus» (jaje ličać druhoj pa prestyžnaści ŭ Halivudzie paśla «Oskara») prahučała videazajava prezidenta Ukrainy Uładzimira Zialenskaha.
11.01.2023 / 08:31
Fota: Jacquelyn Martin / AP Photo
Jaho pradstaviŭ akcior Šon Pen, jaki nieadnarazova byŭ va Ukrainie paśla pačatku poŭnamaštabnaj vajny i navat pryvioz Zialenskamu ŭ Kijeŭ svoj «Oskar».
Zialenski nahadaŭ, što «Załatyja hłobusy» pačali ŭručać padčas Druhoj suśvietnaj vajny, u 1943 hodzie. Jon zajaviŭ, što bitva Ukrainy suprać rasijskaha ŭvarvańnia simvalizuje «baraćbu za pravy novaha pakaleńnia, jakoje viedała pra vajnu tolki z kino».
«U Pieršaj suśvietnaj vajnie zahinuli miljony ludziej. Druhaja suśvietnaja vajna zahubiła dziasiatki miljonaŭ. Treciaj suśvietnaj vajny nie budzie. Heta nie tryłohija», — skazaŭ Zialenski.
Jon dadaŭ, što Ukraina spynić rasijskuju ahresiju z dapamohaj demakratyčnych krain śvietu.
«Vajna ŭ Ukrainie pakul nie skončana, ale ŭ joj nadychodzić pierałom, i ŭžo zrazumieła, chto pieramoža. My zrobim heta razam z usim volnym śvietam, i ja spadziajusia, što ŭsie vy budziecie z nami ŭ hety pieramožny dzień, dzień našaj pieramohi», — skazaŭ Zialenski.