Brytanskaja raźviedka: Rasijskaje-biełaruskija vučeńni — nie padrychtoŭka da nastupu va Ukrainie
11.01.2023 / 11:11
Ministerstva abarony Vialikabrytanii ŭ štodzionnaj zvodcy vajennaj raźviedki źviartaje ŭvahu na toje, što na minułym tydni Minabarony Biełarusi abviaściła ab sumiesnych rasijska-biełaruskich taktyčnych lotnych vučeńniach, jakija projduć u krainie z 16 studzienia da 1 lutaha.
Fota ilustracyjnaje
Naziralniki adznačyli prybyćcio ŭ Biełaruś z Rasii 12 viertalotaŭ Mi-8, a taksama ŭdarnych viertalotaŭ Mi-24 i Ka-52. Niekatoryja ź ich byli z markiroŭkaj «Z», jany pryziamlilisia na avijabazie pad Minskam.
Razhortvańnie hetaj bajavoj avijacyi — chutčej za ŭsio, sapraŭdy vajskovyja vučeńni, miarkujuć u brytanskaj raźviedcy. Tam nie ličać heta padrychtoŭkaj da jakich-niebudź dadatkovych nastupalnych apieracyj suprać Ukrainy.
Choć Rasija trymaje vialikuju kolkaść sił u Biełarusi, jany ŭ asnoŭnym udzielničajuć u navučańni, i małavierahodna, što hetyja vojski mohuć być vykarystany dla nastupu va Ukrainie, havorycca ŭ spravazdačy.