Polski hienierał: Rasija moža ŭdaryć z boku Varonieža, Kurska i Branska
Mienavita ciapier nadychodzić vyrašalny i, mahčyma, pierałomny momant u rasijska-ŭkrainskaj vajnie, tamu mienavita ciapier nieabchodna ŭ razy pavialičyć dapamohu zbrojaj Ukrainie, zajaviŭ u intervju BBC News Ukraina hienierał Valdemar Skšypčak, jaki ŭ minułym kamandavaŭ suchaputnymi siłami Polščy i zajmaŭ pasadu namieśnika ministra abarony.
19.01.2023 / 14:11
Jak adznačaje hienierał Skšypčak, paśla taho, jak rasijskaja armija paciarpieła pravał u viasnovaj i letniaj kampanijach, jana stała, pačynajučy z kastryčnika, kancentravać vojski ŭ rajonie Branska, Kurska i Varonieža. Mienavita tam zasiarodžana bolšaść z 300 tysiač sałdat, nabranych u chodzie masavaj mabilizacyi.
Hienierał ličyć, što Rasija moža znoŭ udaryć pa Ukrainie mienavita z hetaha napramku i rušyć na poŭdzień. Pry hetym scenary pad udaram apynucca Pałtava i Dniepr. Na Kijeŭ Pucin, chutčej za ŭsio, nie pojdzie, a skarystajecca stratehijaj małych krokaŭ, jakuju jon užyŭ u 2014 hodzie, kali zachapiŭ Łuhansk i Danieck, prahnazuje polski hienierał.
Dalej, chutčej za ŭsio, jaho metaj budzie častka Charkaŭskaj vobłaści, Łuhanskaj, Danieckaj, Zaparožskaj i Chiersonskaj abłaściej. A voś ci ŭdasca jamu heta zrabić, zaležyć, na dumku Skšypčaka, ad toj dapamohi, jakuju pavinien dać Ukrainie Zachad.
«Heta padobna da taho, kali lekar daje chvoramu tolki niekalki kropiel leku zamiest paŭnavartasnaha lačeńnia», — kaža jon.
Pra toje, što vajennaja dapamoha Ukrainie z boku Zachadu nosić svajho rodu kropielny charaktar i jaje krytyčna nie chapaje dla paśpiachovaha adbićcia rasijskaj ahresii, apošnim časam šmat kažuć u Kijevie, hety punkt hledžańnia padzialajuć i vajennyja ekśpierty.
Z-za vysokaj vierahodnaści novaha nastupu Rasii ŭ nastupnyja dva-try miesiacy, Ukrainie jak maha chutčej varta pieradać bolš tankaŭ, braniatechniki i dalnabojnych rakietnych sistem, jakija stralajuć na 300 i bolš kiłamietraŭ, śćviardžaje hienierał.
U jakaści prykładu jon pryvodzić toj fakt, što ŭkrainskaja armija nie moža rabić hłybokija rakietnyja ŭdary pa vialikaj kolkaści rasijskich vojskaŭ, a takim čynam možna było b efiektyŭna sarvać padrychtoŭku da nastupu na ŭkrainskuju terytoryju. Ale USU nie mohuć nanieści hetyja ŭdary, tamu što nie majuć adpaviednaj zbroi.
Hienierał taksama adznačaje, što, pakolki Zachad tak i nie advažyŭsia ŭvieści režym zakrytaha nieba nad Ukrainaj, joj samoj davodzicca abaraniacca ad udaraŭ z pavietra i treba rychtavacca da taho, što pry novym mahčymym nastupie Rasija budzie vykarystoŭvać značna bolš svaich bajavych samalotaŭ.
Ukrainie patrebnyja dalnabojnyja rakiety, kab ich źbivać jašče na starcie nad terytoryjaj Rasii abo nad terytoryjaj Biełarusi, pakolki heta — prava Ukrainy na samaabaronu, pierakanany Valdemar Skšypčak.
Što datyčyć patencyjnaha scenara novaha napadu na Ukrainu z boku Biełarusi, to polski hienierał jaho vyklučaje. Kali b biełaruskuju armiju možna było zadziejničać u hetaj vajnie, heta daŭno b adbyłosia, miarkuje jon, źviartajučy ŭvahu na toje, što Rasija ŭžo prysvoiła sabie bolšuju častku biełaruskich uzbrajeńniaŭ.