На выхадных зноў магчымыя праблемы з касавым абсталяваннем
Міністэрства падаткаў і збораў папярэдзіла гандаль, што ў найбліжэйшыя выхадныя, 28-29 студзеня, магчымыя перабоі ў рабоце касавага абсталявання і гандлёвых аўтаматаў.
26.01.2023 / 19:28
Здымак ілюстрацыйны. Фота: Office Life
«У сувязі з правядзеннем у перыяд з 9:00 28 студзеня да 29 студзеня планавых тэхнічных работ магчымыя перабоі з доступам у асабісты кабінет уладальніка касавага абсталявання ў сістэме кантролю касавага абсталявання (СККА), на сайт і ў асабісты кабінет сістэмы кантролю гандлёвых аўтаматаў (СКГА)», — сказана ў паведамленні.
З гэтага паведамлення, праўда, цяжка зразумець, працягнуцца тэхнічныя работы і 29 студзеня ці яны да гэтага дня ўжо скончацца.
У самым пачатку студзеня карыстальнікі ўжо сутыкнуліся з праблемамі аплаты ў гандлёвых аб'ектах, на запраўках з-за касавага збою. Тады праблемы мела кампанія «Тусон», якая кіруе гэтым абсталяваннем. На гэты момант тая праблема лічыцца цалкам ліквідаванай.