Стала вядома сума, якую суму банкір Касцючэнка аддаў за датэрміновы выхад з турмы
Былы кіраўнік Прыёрбанка Сяргей Касцючэнка выйшаў з турмы на мінулым тыдні і ўжо пакінуў Беларусь. Але яму прыйшлося плаціць.
01.02.2023 / 20:55
Фота: bspu.by
Па інфармацыі «Нашай Нівы», гэта сума большая за 10 мільёнаў даляраў і ўключае розныя плацяжы.
Большая частка выкупу аформлена як «спонсарская падтрымка» хакейнага клуба «Дынама-Мінск» ад Прыёрбанка. Гаворка ідзе пра суму каля 10 мільёнаў даляраў.
Па затрыманні банкіра хадзілі чуткі, што незадоўга да арышту ён адмовіў фаварыту Лукашэнкі, былому кіраўніку Федэрацыі хакея Беларусі, а цяпер сенатару Дзмітрыю Баскаву ў просьбе фінансаваць «Дынама».
Гэта ўжо далёка не першы выпадак, калі з арыштаваных бізнэсменаў патрабуюць грошы ці долі ў кампаніях, і атрыманыя сродкі пераводзяць хакейнаму клубу.
Што датычыць іншай часткі выкупу — называецца сума ад 2 да 3 мільёнаў даляраў, — то яна была пагашана самім Касцючэнкам у рамках кампенсацыі «нанесенай шкоды» па крымінальнай справе супраць яго. Натуральна, выплата рабілася па ўжо знакамітым лукашэнкаўскім дзесяцікратным мульціплікатары.
Сяргея Касцючэнку асудзілі да 3,5 года калоніі ў ліпені 2022-га. Яго абвінавацілі па 243 артыкуле КК — ухіленне ад выплаты падаткаў. Разам з Касцючэнкам асудзілі яшчэ двух бізнэсменаў.
Фармальна пытанні ў сілавікоў выклікала легальная схема эканоміі на падатках з дапамогай сістэмы накапляльнага страхавання «Прыёрлайф», якой карысталіся банкіры для вываду дывідэндаў без выплаты падаходнага.
«Гэта распаўсюджанае ў свеце накапляльнае страхаванне. Сэнс яго ў тым, што ты прыносіш грошы кампаніі, якая вельмі кансерватыўна распараджаецца сродкамі, — класічны пенсійны фонд. Яна абяцае табе даходнасць па праходжанні пэўнага часу, ад некалькіх гадоў. Калі гаворым пра пенсію, то па дасягненні гэтак званага «ўзросту дажывання».
Пры ўводзе грошай у такую сістэму страхавання табе не трэба плаціць з гэтага падаткі — так рабілі многія банкіры, пералічваючы туды дывідэнды ад работы ў банку», — расказвалі суразмоўцы з банкаўскай сферы.
Чытайце падрабязней: Шок у банках: Сяргею Касцючэнку, стваральніку Прыёрбанка, далі тры з паловай гады калоніі. Датычны Баскаў?
Афіцыйнае абвінавачанне палічыла, што фігуранты справы не сплацілі падаткі з сумы 1,5 мільёна рублёў (гэта значыць, у асабліва буйным памеры).
У розныя гады рэйтынг «Ежедневника» ставіў 56-гадовага ўраджэнца Вішнева Валожынскага раёна Сяргея Касцючэнку ў лік дваццаці самых уплывовых бізнэсоўцаў краіны.
Прыёрбанк быў створаны ў 1989 годзе. Банк стаў адным з лідараў банкаўскай сферы Беларусі, долю ў ім выкупіў аўстрыйскі Райфайзен. Касцючэнка — ганаровы консул Аўстрыі.