Kitaj zaklikaŭ ZŠA nie chvalavacca z-za «šara-špijona». Ale tut Pientahon vyjaviŭ druhi taki šar
Kitaj zaklikaje amierykancaŭ zachoŭvać spakoj u adkaz na amierykanskija zajavy ab tym, što ŭ minuły čaćvier u pavietranaj prastory ZŠA byŭ znojdzieny hihancki kitajski pavietrany šar-raźviedčyk. Praz heta dziaržsakratar ZŠA Entani Blinkien navat admianiŭ svoj aficyjny vizit u Piekin. Adnak adnym šaram sprava nie abyšłasia: Pientahon paviedamiŭ, što nad Łacinskaj Amierykaj zaŭvažany jašče adzin taki kitajski «šar-raźviedčyk», piša ruskaja słužba BBC News.
04.02.2023 / 21:48
Pa danych amierykanskaha boku, zaŭvažany pieršym kitajski latalny aparat prajšoŭ na vialikaj vyšyni nad terytoryjaj Alaski i Kanady, paśla čaho apynuŭsia nad Mantanaj, dzie znachodziacca puskavyja šachty amierykanskich balistyčnych rakiet, zdolnych nieści jadziernyja bojezarady.
Amierykancy vyrašyli nie źbivać šar, pakolki jon znachodziŭsia vyšej za pavietranyja kalidory, jakija vykarystoŭvaje hramadzianskaja avijacyja i ŭ pavietry niebiaśpieki nie ŭjaŭlaŭ, a voś u vypadku padzieńnia jaho abłomkaŭ na ziamlu chto-niebudź moh paciarpieć.
Incydent pryvioŭ u lutaść amierykanskaje kiraŭnictva, i Entani Blinkien zajaviŭ, što zjaŭleńnie nad terytoryjaj ZŠA kitajskaha «šara-raźviedčyka» zjaŭlajecca vidavočnym parušeńniem suvierenitetu ZŠA i mižnarodnaha zakanadaŭstva, a taksama biezadkaznym krokam, tym bolš nieprymalnym, kali ŭličyć, što jon byŭ ździejśnieny napiaredadni daŭno zapłanavanaha i pieršaha za šmat hadoŭ vizitu ŭ Piekin dziaržsakratara.
Blinkien mieŭ namier naviedać Piekin z 5 pa 6 lutaha, kab abmierkavać šerah važnych pytańniaŭ, uklučajučy mižnarodnuju biaśpieku, Tajvań i kavid, adnak paśla zjaŭleńnia nad Amierykaj kitajskaha «šara-raźviedčyka» vizit pryjšłosia admianić.
Telekanał ABC-11 sa spasyłkaj na pradstaŭnika ŭładaŭ vysokaha ranhu, znajomaha ź situacyjaj, paviedamiŭ, što ZŠA nibyta majuć namier pačakać, kali kitajski aerastat budzie ŭ niebie nad Atłantyčnym akijanam, i pasprabujuć źbić jaho tam.
Piekin doŭha admoŭčvaŭsia, ale ŭ piatnicu pryznaŭ, što heta sapraŭdy jaho šar, ale nijaki nie raźviedčyk, a mirny mietearałahičny zond, jaki adchiliŭsia ad kursu z-za drennaha nadvorja, u suviazi z čym Piekin vykazvaje škadavańnie.
A ŭ subotu ŭ aficyjnaj zajavie Ministerstva zamiežnych spraŭ Kitaja było adznačana, što Kitaj «nikoli nie ŭryvaŭsia na terytoryi abo ŭ pavietranuju prastoru suvierennych krain».
U zajavie havorycca taksama, što vysokapastaŭleny supracoŭnik kitajskaha MZS abmierkavaŭ hety incydent ź dziaržsakratarom ZŠA i nahadaŭ ab nieabchodnaści trymać adkrytymi kanały suviazi na ŭsich uzroŭniach i zachoŭvać spakoj i zdarovy sens, «asabliva kali davodzicca sutykacca ź niečakanymi situacyjami».
Tym časam Pientahon vyjaviŭ druhi kitajski «šar-raźviedčyk» — ciapier užo nad Łacinskaj Amierykaj. Pra jaho dakładnaje miescaznachodžańnie nie paviedamlałasia, adnak, pavodle krynic, šar bačyli nad Kosta-Rykaj i Vieniesuełaj.
Kitaj pakul nijak nie rastłumačyŭ zjaŭleńnie tam druhoha pavietranaha šara.