Polšča zakryvaje punkt propusku «Babroŭniki» «z mierkavańniaŭ nacyjanalnaj biaśpieki»
U Hrodzienskaj vobłaści nie zastajecca pahranpierachodaŭ z Polščaj. Svajo rašeńnie Varšava pryniała praz dzień paśla prysudu Andreju Pačobutu.
09.02.2023 / 13:04
Polski punkt propusku «Babroŭniki» na miažy z Biełarussiu z 10 lutaha prypynić svaju pracu. Pra heta zajaviŭ ministr unutranych spraŭ i administracyi Polščy Maryjuš Kamiński.
«Z-za važnych intaresaŭ dziaržaŭnaj biaśpieki ja vyrašyŭ prypynić … z 12:00 10 lutaha hetaha hoda ruch na polska-biełaruskim pahranpierachodzie ŭ Babroŭnikach», — paviedamiŭ jon.
Z biełaruskaha boku na hetym pierachodzie znachodzicca punkt propusku «Bierastavica».
Z listapada 2021 hoda praz mihrancki kryzis nie pracuje i pierachod «Bruzhi — Kuźnica».
Takim čynam, u Hrodzienskaj vobłaści nie zastajecca pahranpierachodaŭ z Polščaj. Kab trapić z Hrodzienskaj vobłaści ŭ susiedniuju krainu, ciapier treba jechać abo praz Brest, abo praz pierachody na miažy Biełarusi i Litvy (Bieniakoni, Pryvałka). Heta mocny ŭdar pa ekanomicy rehijona i pryvatnych kantaktach.
Učora, 8 lutaha, byŭ abvieščany prysud žurnalistu i aktyvistu polskaj nacyjanalnaj mienšaści Andreju Pačobutu — 8 hadoŭ uzmocnienaha režymu.