Да 15 гадоў калоніі. Агучылі выракі ў справе «Рабочага руху»
У Гомелі 17 лютага абвясцілі прысуд абвінавачаным па крымінальнай справе «Рабочага руху». Амаль усе асуджаныя працавалі на вялікіх беларускіх прадпрыемствах: «Нафтан», «Гродна Азот», БМЗ, «Атлант», Беларуская чыгунка. Большасць — рабочыя.
17.02.2023 / 13:19
«Рабочы рух» — аб’яднанне рабочых, якія былі не згодныя з тым, што адбываецца ў краіне. Людзі былі гатовыя адкрыта выказвацца і адстойваць сваю пазіцыю.
21 верасня 2021 года прызналі экстрэмісцкай арганізацыяй і «Рабочы рух». Адразу прайшла хваля затрыманняў: актывістаў хапалі і ў Беларусі, і ў Расіі. Некаторых людзей затрымлівалі яшчэ з 17 верасня, да афіцыйнага прызнання руху «экстрэмісцкім». Працаваў КДБ.
У справе налічвалася 38 тамоў, у тым ліку сакрэтны. Суд доўжыўся тры месяцы, праходзіў з 9 лістапада, большая частка працэсу праходзіла ў закрытым рэжыме. Абвінавачаныя адмовіліся даваць паказанні.
У выніку, як піша «Радыё Свабода», Сяргея Шэлеста пакаралі 14 гадамі калоніі;
Уладзіміра Жураўку — 15 гадамі калоніі;
Андрэя Пагерылу — 14 гадамі калоніі;
Ганну Аблаб — 11 гадамі калоніі;
Аляксандра Гашнікава — 14 гадамі калоніі;
Сяргея Дзюбу — 12 гадамі калоніі;
Ігара Мінца — 12 гадамі калоніі;
Валянціна Цераневіча — 12 гадамі калоніі;
Сяргея Шамецьку — 12 гадамі калоніі;
Аляксандра Капшуля — 15 гадамі калоніі.
Усе дзесяць фігурантаў не прызналі віну ў здрадзе дзяржаве і стварэнні экстрэмісцкага фарміравання. Андрэй Пагерыла прызнаў віну па артыкуле аб паклёпе.
Аляксандр Капшуль з 31 снежня трымаў галадоўку.