Віктар Лукашэнка адкрыў чарговы «нацыянальны брэнд»
У мінскім гандлёвым цэнтры «Замак» у пятніцу ўвечары адбылася цырымонія адкрыцця крамы IROS. Гэта прэзентуецца як нацыянальны брэнд спартыўнага адзення.
17.02.2023 / 20:46
Як сцвярджаюць прапагандысты, «гэтай падзеі чакалі многія аматары спорту, заўзятары, якія падтрымліваюць алімпійскую каманду. Бо займець сабе ў калекцыю сапраўдную форму прафесійных атлетаў — мара многіх».
У адкрыцці крамы сярод іншых узялі ўдзел Віктар Лукашэнка, які цяпер кіруе беларускім НАК, а таксама вядомыя праўладныя спартсмены.
У якасці твару брэнда IROS прадстаўляецца бронзавая прызёрка Алімпіяды ў Токіа па мастацкай гімнастыцы Аліна Гарнасько.
Вытворца брэнда — прыватнае прадпрыемства «Сола-Пінск», якое раней шыла форму для членаў беларускай алімпійскай зборнай.
З канкрэтнай прадукцыі ў продажы спартыўныя штаны, курткі, джэмперы, байкі, камізэлькі, кепкі. Цэны на іх розныя — і меншыя, і большыя. Напрыклад, як піша выданне Tochka.by, белы мужчынскі жакет з беларускім гербам каштуе 208 рублёў, джэмпер у чырвона-зялёных колерах — 49,5 рубля, чорны жаночы джэмпер — 80 рублёў, кепкі — па 30 рублёў.
Матэрыял выкарыстоўваецца таксама розны, але часцей за ўсё — поліэстар.