Vybuchi na aeradromie Mačuliščy. Bajpoł: Paškodžany rasijski samalot. Z čata Mačuliščaŭ vydalili ŭsie paviedamleńni
Siońnia z 11-j ranicy kala aeradroma «Mačuliščy» nazirajecca aktyŭnaść siłavikoŭ. Miascovyja kažuć, što čuli dva vybuchi kala 8:00-9:30 ranicy. Voś što viadoma na hety momant.
26.02.2023 / 19:16
Skrynšot čata Mačuliščaŭ. Krynica: telehram-kanał «Motolko Pomohi»
Novyja detali zdareńnia paviedamlaje telehram-kanał «Motolko Pomohi».
Siońnia ŭ druhoj pałovie dnia całkam vyčyścili čat haradskoha pasiołka Mačuliščy — vydalenyja absalutna ŭsie paviedamleńni ab hukach vybuchaŭ nočču i ranicaj, siłavikach sa zbrojaj i ŭ broniekamizelkach, pastach DAI, jakija raptam raptam jakija zjavilisia, praviercy aŭto i dakumientaŭ kiroŭcaŭ, a taksama ab mašynach unutranych vojskaŭ.
Kolkaść hetych paviedamlańniaŭ u čacie pacviardžaje, što na aeradromie sapraŭdy niešta adbyłosia.
Pa słovach žycharoŭ, u dadzieny momant paviedamleńni ab zdareńni praciahvajuć vydalacca.
Matolka piša, što pravierka aŭtamabilaŭ praciahvajecca, mašyny praviarajuć ŭžo vybaračna, hladziać pravy kiroŭcy, bahažniki, u niekatorych vypadkach i mabilnyja telefony.
DAI stajać jak minimum na vyjeździe z Hatava, kala pavarotaŭ na Cesina, Plabancy i Dzierhai.
Jość danyja, što pa kvaterach pačaŭ chadzić AMAP u poŭnym abmundziravańni. Pa słovach ludziej, «chodzić pa svaich bčb śpisach, šukajuć chto niešta zrabiŭ».
Akramia taho, navakołli Mačuliščaŭ na praciahu 1,5 hadzin patrulavaŭ viertalot.
Raniej ByPol paviedamiŭ, što pa infarmacyi, atrymanaj ad udzielnikaŭ płana «Pieramoha», u vyniku vybuchaŭ na aeradromie «Mačuliščy» paškodžanyja rasijski vajenna-transpartny samalot i śniehaŭboračnaja technika.