Premjerka Litvy: Admova ad pieravozki biełaruskich hruzaŭ litoŭskaj čyhunkaj — samaje prostaje rašeńnie
Premjer-ministarka Litvy Inhryda Šymanicie ličyć, što kantrabandu ź Biełarusi možna spynić, kali čyhunka admovicca pieravozić tavary ź Biełarusi, piša Delfi.lt.
02.03.2023 / 20:33
Inhryda Šymanicie sa Śviatłanaj Cichanoŭskaj. Fota ilustracyjnaje
Prablemy parušeńnia mižnarodnych sankcyj i kantrabandy ŭ Litvu z boku Biełarusi moža vyrašyć praz admovu «Litoŭskaj čyhunki» ad pieravozki tavaraŭ. Z takoj zajavaj vystupiła premjer-ministrka Litvy Inhryda Šymanicie.
«Choć Litoŭskaja čyhunka zjaŭlajecca pradpryjemstvam, jakim kiruje dziaržava, ale ŭsio ž kamiercyjnym. I heta pytańnie vybaru, ź jakimi partniorami Litoŭskaj čyhuncy mieć spravu, a ź jakimi — nie.
Kali atrymlivaješ zamovu na pieravozku ŭhnajeńniaŭ, niachaj sami ŭhnajeńni nie pad sankcyjami, ale jany pieravoziacca adtul, dzie jość padsankcyjnaja kampanija — vytvorca ŭhnajeńniaŭ, jak u hetym vypadku z «Hrodna Azot»…
Tak, niachaj tam jość namalavanaja ŭ niejkaj biełaruskaj ustanovie papierka, u jakoj śćviardžajecca, što hetaje ŭhnajeńnie było vyrablenaje niejkim ZAT «Try parasiaty», ale jość šmat dobrych pytańniaŭ, ci mahło tak być.
Admova ad pieravozki takoha hruzu, na maju dumku, — samaje prostaje rašeńnie», — zajaviła Inhryda Šymanicie.
Palityk dadała, što kamiercyjnyja pahadnieńni, asabliva tyja, jakija znachodziacca ŭ šeraj zonie, niasuć dla Litoŭskaj čyhunki reputacyjnuju ryzyku. Ciapier kampanija maje mieniej supracoŭnictva z Uschodam i musić pieraaryjentavać svaju dziejnaść na zachodnija rynki.
«Hieahrafična my znachodzimsia ŭ takim miescy, praź jakoje sprabujuć trapić u ES, naturalna, što ŭ nas vialikaja nahruzka. Ale mnie zdajecca, što jość adnosna prostyja rašeńni, jakija mohuć źnizić nahruzku na ŭstanovy, tamu što zarobak tut sapraŭdy vielmi nizki i hnacca za hetym, ja dumaju, nie varta», — adznačyła litoŭskaja premjerka.