Turecki samalot musiŭ viarnucca z paŭdarohi, bo ŭ hruzavym adsieku mocna pachła sadavina
Avijałajnier kampanii Turkish Airlines byŭ vymušany zrabić ekstrannuju pasadku praz niekatory čas paśla vyletu z aeraporta ŭ Stambule. Padčas vykanańnia palotu ŭ hruzavym adsieku samalota spracavali tryvožnyja datčyki, a što pryčyna dla taho była całkam biaskryŭdnaja — razabracca pa chodu nie patrapili.
06.03.2023 / 23:41
Fota ilustracyjnaje
Jak vyśvietliłasia, usiamu vinoj staŭ ekzatyčny frukt pad nazvaj duryjan, zdadzieny ŭ bahaž adnym z pasažyraŭ. Jon maje nastolki mocny i śpiecyfičny pach, što ad jaho datčyki i ŭklučylisia.
Samalot, jaki kiravaŭsia da Barsiełony, tym časam užo paśpieŭ dabracca da pavietranaj prastory Bałharyi. Padumaŭšy, piłoty vyrašyli zrabić ekstrannuju pasadku, a pasažyry musili vypravicca ŭ katałonskuju stalicu inšym samalotam.
Duryjan raście ŭ trapičnych lasach Paŭdniova-Uschodniaj Azii i pra jaho časta kažuć: «piekła zvonku — raj usiaredzinie». Mała taho što płod maje vostryja kalučki, dyk jašče mocny i niepryjemna pachnie. Kožny ŭ hetym pachu adčuvaje niešta svajo: pratuchłuju rybu, časnok, jajki ci cybulu, kanalizacyju, śmiardziučyja škarpetki abo sieravadarod. Ale pry hetym smak u hetaha frukta vielmi pryjemny, asabliva kali jaho pravilna adkryć.