Vializnaja chvala aryštaŭ. Siarod zatrymanych — zahadčyk łabaratoryi i były śpiecnazaviec
Ludziej kašmarać za «niapravilnyja» reposty i palityčnuju aktyŭnaść.
14.03.2023 / 20:09
Hazieta «SB. Biełaruś siehodnia» viarnułasia da praktyki publikacyi videa z zatrymanymi. Na minułym tydni jany apublikavali kala dziasiatka videa brutalnych zatrymańniaŭ, za siońnia vyjšli videa jašče ź siamiu ludźmi, da jakich prychodzili siłaviki.
Alaksandr Leanienka. Fota z kanała HUBAZiK
Adnym z zatrymanych staŭ 66-hadovy Alaksandr Leanienka ź vioski Rymaŭcy Babrujskaha rajona. Jamu zakidajuć udzieł u prateście 30 žniŭnia 2020 hoda. U jaho doma, jak paviedamlajecca, taksama znajšli šmat biełaruskaj simvoliki.
Pavał Ecin. Fota: staronka va ŭkantakcie
Zatrymali taksama 41-hadovaha Paŭła Ecina z Homiela. Jon pracuje zahadčykam navukova-daśledčaj łabaratoryi «Transpartnyja srodki» ŭ Biełaruskim dziaržaŭnym univiersitecie transpartu. Jaho abvinavacili ŭ «ekstremisckim» repoście na staroncy ŭ fejsbuku i prysudzili 15 sutak aryštu.
Viačasłaŭ Archipienka. Fota: staronka va ŭkantakcie
Taksama vyjšła videa z 27-hadovym Viačasłavam Archipienkam. Jon rodam sa Žłobina, niekali prachodziŭ słužbu ŭ śpiecnazie. Mužčynu zakidajuć «raspaŭsiudžvańnie ekstremisckich materyjałaŭ».
Siarhiej Fileŭ. Fota: staronka va ŭkantakcie
Zatrymali i 28-hadovaha čyhunačnika z Homiela Siarhieja Fileva. Nieviadoma, u čym jaho abvinavacili, ale ŭ videa jon kaža, što niekali byŭ padpisany na «destruktyŭnyja kanały» i schadziŭ na paru mitynhaŭ, ale «pierastaŭ cikavicca palitykaj».
Dźmitryj Zocikaŭ. Fota: staronka va ŭkantakcie
44-hadovy fatohraf z Mazyra Dźmitryj Zocikaŭ taksama byŭ zatrymany. U mužčyny jość mały syn. U videa siłavikoŭ jon raspaviadaje, što nibyta byŭ padpisany na «kanały i resursy, pryznanyja destruktyŭnymi», «dasyłaŭ infarmacyju ŭ čat-bot «Hołas», a taksama dahetul padpisany na niezaležnuju presu.
Mikałaj Bielski. Fota: praŭładny kanał
Jašče adnym zatrymanym staŭ piensijanier Mikałaj Bielski. Mužčyna raspaviadaje, što byccam niekali čytaŭ «ekstremisckija kanały», ale paśla pierastaŭ.
Fota z praŭładnaha kanała
Imia apošniaha zatrymanaha ź videa nieviadomaje. Jon taksama kaža, što nibyta niekali byŭ padpisany na «ekstremisckija kanały», ale paśla «adpisaŭsia ad ich».
Asudžanyja hetyja mužčyny ci adpuščanyja na volu, nieviadoma. Paviedamlałasia tolki pra administracyjny prysud Paŭłu Ecinu.
Padčas čarhovaj akcyi zastrašvańnia hramadstva paśla dyviersii ŭ Mačuliščach pa ŭsioj krainie zatrymali ci prychodzili z vobšukam da sotniaŭ čałaviek, suprać niekalkich dziasiatkaŭ zaviali kryminalnyja spravy. Siarod zatrymanych psichijatry i psichaterapieŭty, rekanstruktary, byłyja aktyvisty, tyja, kaho zatrymalivali ŭ 2020-m i inšyja hrupy ludziej. Imavierna, pa hetaj spravie moža być zatrymany namieśnik Miaśnikoviča Dźmitryj Šadko.
Pry hetym zatrymanyja nie majuć anijakaj suviazi z vykanaŭcami dyviersii. Heta inšyja ludzi.
Kaho mienavita zatrymali ŭ vioscy Čarciaž? Heta siamiejnaja para, u ich dvoje dziaciej
Paśla ataki ŭ Mačuliščach iduć pavalnyja zatrymańni — i ludziej pavalna sprabujuć vierbavać