Vystava represavanych mastakoŭ adkryłasia ŭ Muziei volnaj Biełarusi
U Varšavie adkryłasia vystava karcin represavanych biełaruskich mastakoŭ pad nazvaj «Vitanki ź Biełarusi». Usie siamnaccać tvorcaŭ-udzielnikaŭ vymušana pakinuli Radzimu, bolšaść ź ich adbyli turemnyja terminy. Taksama pakazali malunki Paŭła Sieviarynca, jaki pa siońniašni dzień znachodzicca ŭ turmie, piša Reform.by.
18.03.2023 / 12:12
Instalacyja z tvoram Antona Radzivonava. «Viasna na sercy».
U Varšavie adkryłasia vystava karcin represavanych biełaruskich mastakoŭ pad nazvaj «Vitanki ź Biełarusi». Usie siamnaccać tvorcaŭ-udzielnikaŭ vymušana pakinuli Radzimu, bolšaść ź ich adbyli turemnyja terminy. Taksama pakazali malunki Paŭła Sieviarynca, jaki pa siońniašni dzień znachodzicca ŭ turmie.
Viktar Siarhiej. Tlejučy pozirk. 2022. Fota: reform.by.
Na vystavie zhadali i inšych źniavolenych mastakoŭ — Alesia Puškina i Hienadzia Drazdova. A Pavieł Łatuška padčas svajho vystupu na viernisažy nahadaŭ pra vielmi pazityŭnuju padzieju, što zdaryłasia jakraz u dzień adkryćcia: Mižnarodny kryminalny sud u Haazie vydaŭ ordar na aryšt Uładzimira Pucina.
«Dla mianie, jak dla palityka, jak dla dypłamata i jurysta, jaki vučyŭsia mižnarodnamu pravu, heta aznačaje, što daroha adkrytaja… Daroha adkrytaja taksama i dla Alaksandra Łukašenki. My budziem zmahacca, kab jon byŭ pryciahnuty da adkaznaści… u tym liku i za złačynstvy suprać našaj biełaruskaj kultury», — skazaŭ palityk.
Pierformans na adkryćci vystavy «Vitanki ź Biełarusi». Fota: reform.by.
Varta adznačyć, što farmat vystavy — nie zusim kłasičny. Volnaja raźvieska, pałotny biez ram, tvory roznaha ŭzroŭniu, adabranyja nie pavodle mastackich kryteryjaŭ, a pavodle palityčnych. Mastactva na ścienach Muzieja volnaj Biełarusi źjaŭlajecca praciaham aktyvisckich praktyk, jakija pačalisia na vulicach biełaruskich haradoŭ u 2020-ja. Jasny pasył, ščyraje žadańnie vykazacca, volnaja forma — my pamiatajem, jakaja chvala kreatyvu tady paŭstała! Častka tahačasnych artefaktaŭ zachoŭvajecca ŭ Muziei volnaj Biełarusi.
Źmicier Šapavałaŭ. Bitva pad Pałonkaj. 2013. Fota: reform.by.
Ekspazicyja mieła niekalki sensavych vuzłoŭ.
U centry raźmiaścili dva stały, adzin simvalična naležaŭ čałavieku, što byŭ pazbaŭleny pracy ci vymušany pakinuć radzimu, druhi pakazvaŭ pobyt palitviaźnia: cyhareta, zapałki, łyžka, kubak, listy. Tam ža lažaŭ malunak Uładzisłava Makavieckaha, zrobleny ŭ turmie. Kuratarka vystavy Volha Šnip ahučyła prośbu mastaka damalavać vyjavu.
Instalacyja ź biełaj i čornaj tkaniny simvalizavała dva baki našaha žyćcia, jakija mastactva zdolnaje źjadnać i prymiryć: bo ŭ čornym jość probliski biełaha, a ŭ biełym jość kvietki, ptuški i tvorčaść.
Instalacyja «Stoł palitźniavolenaha» na vystavie «Vitanki ź Biełarusi». Fota: reform.by.
Adzin z samych kranalnych abjektaŭ na vystavie — instalacyja z turemnych malunkaŭ Kasi Budźko, a pobač — šviejnaja mašynka jak simvał turemnaj pracy, jakuju jana vykonvała.
Kala ŭvachodu ŭ ekspazicyju da ściany halerei prymacavali arkušyki papiery z dramatyčnymi historyjami mastakoŭ.
Instalacyja z turemnych malunkaŭ Kasi Budźko. Fota: reform.by.
Paśla adkryćcia adbyŭsia dabračynny aŭkcyjon, sabranyja srodki pojduć na padtrymku represavanych mastakoŭ i art-rezidencyi «Dom Tvorcaŭ», jakaja źjaŭlajecca adnym z arhanizataraŭ vystavy.
Vystava adkryłasia ŭ Muziei volnaj Biełarusi pa adrasie Foksal, 11.
Čytajcie taksama:
Polskija śpiecsłužby admianili kancert Marharyty Laŭčuk u Varšavie
Na finskim kinafiestyvali pieramoh biełaruski dakumientalist