Śviet

U Italii ŭciok z-pad chatniaha aryštu syn krasnajarskaha hubiernatara, jakoha mieli pieradać u ZŠA

Arciom Us, syn hubiernatara Krasnajarskaha kraja Alaksandra Usa, źbieh z pad chatniaha aryštu ŭ Italii. Ciapier viaducca jaho pošuki, paviedamlajuć miascovyja ŚMI.

Arciom Us. Fota ź jaho sacyjalnych sietak

Arciom Us byŭ zatrymany ŭ Italii na zapyt ZŠA ŭ kastryčniku minułaha hoda. Jon abvinavačvajecca va ŭchileńni ad sankcyj i admyvańni hrošaj.

Pa viersii amierykanskaha Minfina, Us i jašče čaćviora rasijan udzielničali ŭ schiemach pa realizacyi nafty ź Vieniesueły z vykarystańniem padstaŭnych kampanij i kryptavalut, a taksama zajmalisia zakupam na Zachadzie padsankcyjnaj elektroniki padvojnaha pryznačeńnia i vajennych technałohij.

20 sakavika sud Miłana pryniaŭ stanoŭčaje rašeńnie pa pytańni jaho ekstradycyi ŭ ZŠA.

Uciok zatrymany 21 sakavika, na nastupny dzień paśla rašeńnia suda ekstradavać jaho ŭ ZŠA.

«Biznesmien Arciom Vus złamaŭ svoj elektronny branzalet na nazie i źbieh z-pad chatniaha aryštu pad Miłanam paśla taho, jak daviedaŭsia pra svaju ekstradycyju ŭ ZŠA pa abvinavačvańni va ŭchileńni ad sankcyj i admyvańni hrošaj», — paviedamlaje italjanskaje ahienctva ANSA.

Čytajcie taksama:

U Italii zatrymali syna hubiernatara Krasnajarskaha kraja

Kamientary da artykuła