«Apieratyŭna reahavać na destruktyŭnyja pracesy ŭ ŚMI». Deputaty znoŭ rychtujuć źmieny ŭ zakon ab miedyja
«ŚMI —heta zbroja, a značyć, i «bojekamplekty» pavinny być natočanyja», — vykazałasia deputatka Ananič.
07.04.2023 / 11:40
Pasiadžeńnie pastajannaj kamisii pa pravach čałavieka, nacyjanalnych adnosinach ŚMI adbyłosia 6 krasavika. Ź infarmacyjaj pra nieabchodnaść papravak u dziejny zakon ab ŚMI vystupiła deputatka Lilija Ananič.
Jana adznačaje, što novyja papraŭki «istotna pašyrajuć mahčymaści rehulatara adekvatna i apieratyŭna reahavać na destruktyŭnyja pracesy ŭ ŚMI i internet-prastory».
«Istotnyja navacyi prapanujucca i ŭ płanie simietryčnaha adkazu na mahčymyja vypady niedružalubnych krain u dačynieńni da biełaruskich miedyja, a taksama ŭ rehulavańni funkcyjanavańnia navinnych ahrehataraŭ, jakija karystajucca papularnaściu. Kali ŚMI, internet-resursy — zbroja, a heta tak, značyć, i «bojekamplekty» z usioj infrastrukturaj pavinny być natočanyja pa apošnim słovie prava», — vykazałasia jana.
Jakija papraŭki rychtujucca, nie ŭdakładniajecca.
Adznačajecca tolki, što zakon pryvodzicca ŭ adpaviednaść z pravaprymianialnaj praktykaj, a taksama normami abnoŭlenaj Kanstytucyi i aktami Łukašenki, jakija zakranajuć pravaadnosiny ŭ infarmacyjnaj śfiery.
U 2021 hodzie zakon ab ŚMI ŭžo zrabili bolš žorstkim. Tady žurnalistam zabaranili vieści anłajn-tranślacyi pratestaŭ suprać ułady, uviali dadatkovyja padstavy błakavać miedyja, uviali novyja abmiežavańni dla raspaŭsiudžvańnia infarmacyi (naprykład, zabaranili miedyja publikavać vyniki apytańniaŭ).
U apošnija hady byli pryniatyja papraŭki i ŭ inšyja zakony, jakija abmiežavali dziejnaść ŚMI. Tak, zabaranili zakliki da sankcyj, jakija ŭłady traktujuć advolna, raspaŭsiudžvańnie piersanalnych danych čynoŭnikaŭ.
Za kratami ciapier, pa padlikach Biełaruskaj asacyjacyi žurnalistaŭ, 35 supracoŭnikaŭ miedyja.