Darahija srodki dla čystki zamienić vocat
Vocat efiektyŭna dapamoža pazbavicca ad plam, ačyścić zabrudžanyja pavierchni i nadaść blask mebli.
10.04.2023 / 20:44
Vocat vydatna čyścić
Dla čystki vam spatrebicca raźvieści ŭ roŭnych dolach vocat i vadu. Zmočanaj u hetym rastvory anučkaj ź miakkaj tkaniny možna pracierci pył z roznych pradmietaŭ, u tym liku z kampjutara ci pryntara. Zmočanym vatnym tamponam lohka ačyścicca kłavijatura kampjutara ci panel knopkavaha telefona. Tolki nie zabudźciesia pierad hetym adklučyć prybor ad siłkavańnia.
Taki ž rastvor dapamoža ačyścić ad pyłu vieniecyjanskija žaluzi na vašym aknie. Dla hetaha nieabchodna nadzieć na ruku bavaŭnianuju palčatku i zmačyć palcy ŭ rastvory. Zatym palcami pravieści pa bakach kožnaj płaścinki. Pieryjadyčna nieabchodna apałoskvać palčatku ŭ čystaj vadzie.
Čysty vocat dapamoža źniać nalepki i ceńniki, raźmieščanyja na mebli, škle ci płastyku. Dla hetaha treba zmačyć vuhły i baki etykietak. Kali jany razmoknuć — saskrebci płastykavaj kartkaj. Kali zastalisia lipkija reštki, to ich znoŭ treba namačyć vocatam i saskrebci. Praź niekalki chvilin paśla hetaha pavierchniu treba pracierci čystaj tkaninaj.
Vocat pračyścić źlivy i źniščyć niepryjemnyja pachi
Sumieś vocatu i charčovaj sody dapamoža pračyścić kanalizacyju. Taki sposab bolš ekanamičny i mienš ahresiŭny, čym luby inšy chimičny srodak. U varonku źlivu spačatku vysypcie pałovu šklanki (125 mł) charčovaj sody, zatym zalicie tudy šklanku (250 mł) vocatu. Paśla taho, jak piena, atrymanaja ŭ vyniku hašeńnia sody vocatam, źniknie, zmyjcie ŭsio ciopłaj vadoj z-pad krana. Praz 5 chvilin zmyjcie ŭžo chałodnaj vadoj.
Vocat dapamoža pazbavicca ad pachu cyharet. Dla hetaha nieabchodna im namačyć tkaninu i trochi joju pamachać u pakoi.
Kali ž niešta padhareła na kuchni, to pazbavicca ad pachu dapamoža niehłybokaja miska, napoŭnienaja na try čverci jabłyčnym vocatam. Pach pavinien źniknuć praz sutki.
Łustačka biełaha chleba, zmočanaja ŭ vocacie, dapamoža pazbavicca ad niepryjemnaha pachu łanč-boksa: chleb treba pakinuć u im na noč.
Dźvie šklanki vocatu, zalityja na noč va ŭnitaz, dapamohuć jaho pradezynfikavać i ačyścić.
Vocat adčyścić vannu ad kamieniu
Vocat dapamoža viarnuć blask vašym rakavinam i vannam. Dla hetaha dastatkova ich pracierci anučkaj, zmočanaj u čystym vocacie.
Pazbavicca ad plam, stvoranych žorstkaj vadoj, dapamohuć try šklanki vocatu, jakija zalivajucca ŭ vannu i rastvarajucca ŭ haračaj vadzie. Vada pavinna zakryć usie plamy. Zatym dajuć čatyry hadziny pastajać. Za hety čas plamy pavinny raźmiakčycca. Vadu źlivajuć i saskrabajuć plamy. Kab adnavić koler na miescy plam, nieabchodna ich pracierci zubnoj ščotkaj, zmočanaj u vocacie.
Kab vydalić niepryjemnyja plamy ad vady ź dźviarej dušavoj kabiny i zrabić ich bliskučymi, nieabchodna ich pracierci tkaninaj, zmočanaj u sumiesi pałovy šklanki vocatu, šklanki našatyrnaha śpirtu, čverci šklanki charčovaj sody i 3,5 litra (14 šklanak) haračaj vady.
Tkaninaj, zmočanaj u vocacie, dobra ačyščajucca krany, sušyłki dla ručnikoŭ, lusterki i dźviarnyja ručki.
A źniać vapnavyja adkłady z dušavych nasadak dapamoža ich źmiaščeńnie na 10 chvilin u sumieś 4 šklanak kipieniu i pałovy šklanki vocatu. Kali ŭ nasadak jość płastykavyja častki, to vada pavinna być prosta haračaj. Kali nasadka nie zdymajecca, to jaje źmiaščajuć u polietylenavy pakiet, jaki napaŭniajuć vocatam i pakidajuć na hadzinu. Zatym pakiet zdymajuć i pracirajuć nasadku.
Vocatam čyściać dyvany
Vocat dapamoža pazbavicca ad chimikataŭ, pyłu i niepryjemnych pachaŭ, jakija ŭvabrała vaša adzieńnie. Dla hetaha dastatkova dadać 1 šklanku (250 mł) vocatu ŭ pralnuju mašynu.
Vocat dapamoža zachavać kolery adzieńnia i nie daść pafarbavać inšyja rečy. Dla hetaha pierad myćciom treba zamačyć novaje adzieńnie ŭ niekalkich šklankach nieraźviedzienaha vocatu na 10—15 chvilin.
Dla taho, kab pačyścić i aśviažyć farby dyvanoŭ, treba ich pačyścić ščotkaj, zmočanaj u rastvory adnoj šklanki vocatu i 3,5 litra vady. Paśla čystki treba prosta dać vysachnuć.
Kali na dyvanach jość staryja plamy, to ich možna adčyścić z dapamohaj sumiesi 2 stałovych łyžak (30 mh) soli i pałovy šklanki vocatu. Jaje nanosiać na plamu i dajuć vysachnuć. Zatym pyłasosiać. Kali ž plamy vialikija i ciomnyja, to ŭ rastvor dabaŭlajuć 35 mh bury (tetrabaratu natryju).
Dla vyviadzieńnia vielmi stojkich plam spatrebicca pasta, pryhatavanaja z adnoj stałovaj łyžki vocatu i takoj ža kolkaści kukuruznaha kruchmału. Hetaj pastaj treba enierhična pacierci plamu suchoj anučkaj i pakinuć na dva dni. Zatym prapyłasosić.
Možna zrabić rastvor dla vyviadzieńnia plam. Dla hetaha spatrebicca dźvie butelki z raspylalnikam. Pieršuju napaŭniajuć rastvoram ź piaci častak vady i adnoj častki vocatu. U druhuju na piać častak vady dadajuć adnu častku našatyrnaha śpirtu. Spačatku plamu namočvajuć rastvoram z vocatu. Pakidajuć na niekalki chvilin, a zatym prasušvajuć čystaj suchoj tkaninaj. Paśla hetaha na plamu raspylajuć rastvor z našatyrnym śpirtam. Tak paŭtarajuć da toj pary, pakul plama nie źniknie.
Vocat viartaje biel škarpetkam
Vocat dapamoža viarnuć jarkaść biełym škarpetkam. Dla hetaha ŭ kastruli razvodziać 1 šklanku vocatu i 6 šklanak vady (1,5 litra). Davodziać da kipieńnia i pieralivajuć u misku ci viadro, kudy źmiaščajuć škarpetki, i pakidajuć na noč. Na nastupny dzień myjuć, jak zvyčajna.
Vocat taksama dapamoža adbialić pažoŭkłuju bializnu. Dla hetaha jaje nieabchodna zamačyć na noč u rastvory 1 častki vocatu i 12 častak ciopłaj vady.
Vocat zamienić źmiakčalnik dla vady i bializny. Dla hetaha ŭ pralnuju mašynu dadajuć 1 šklanku vocatu pierad pačatkam myćcia. Adnačasova vocat dapamoža pazbavicca ad bakteryj i ažyvić kolery (u apošnim vypadku budzie dastatkova i pałovy šklanki).
Vocat i dreva
Kali ŭ domie jość draŭlanyja paneli, to nadać im śviežaść i blask dapamoža naniasieńnie na ich rastvoru ź litra vady, 4 stałovych łyžak vocatu i 2 stałovych łyžak aliŭkavaha aleju. Drevu dajuć uvabrać u siabie hetu sumieś, a zatym palirujuć suchoj anučkaj.
Rastvor jabłyčnaha vocatu i jodu dapamoža zamaskiravać drapiny na draŭlanych pavierchniach. Dla hetaha jaho z dapamohaj pendźlika nanosiać na drapinu. Dla ciomnych parod dreva ŭ rastvor dadajuć bolš jodu. Kali dreva śvietłaje — bolš vocatu.
Vocat suprać plamaŭ tłušču
Ačyścić ad tłušču rakavinu, duchoŭku ci kuchonny stoł dapamoža rastvor vocatu i vady (1:1).
2—3 stałovyja łyžki vocatu možna dadać u myjny srodak i ŭzboŭtać. Heta pavialičyć zdolnaść srodku ačyščać tłušč. Akramia taho, hety rastvor budzie niejtralizavać pachi.
Vocat dla čystki chaładzilnika i mikrachvaloŭki.
Sumieśsiu vocatu i vady (1:1) myjuć chaładzilnik jak znutry, tak i zvonku, u tym liku prakładki dźviarej i skryni dla praduktaŭ. Kab praduchilić zjaŭleńnie pleśni, treba pracierci ŭnutranyja ścienki i ŭnutranyja častki skryniaŭ dla zachoŭvańnia anučkaj, zmočanaj čystym vocatam.
A dla čystki mikrachvaloŭki nieabchodna ŭ jaje źmiaścić misku, napoŭnienuju rastvoram adnoj šklanki vady i čverci šklanki vocatu. Zatym heta sumieś razahravajecca piać chvilin na maksimalnaj mahutnaści. Paśla taho, jak vadkaść astynie, mikrachvaloŭku pracirajuć hubkaj ci tkaninaj, zmočanaj u joj.
Vocat dezynfikuje
Viadoma, što vocat — heta efiektyŭny srodak, jaki dezynfikuje. Jon zabivaje kišečnuju pałačku, bakteryi salmanieły i stafiłakoka, tamu rekamiendujecca im apracoŭvać kuchonnyja doški paśla kožnaha vykarystańnia. Kali doška zroblena z dreva, to spačatku jaje pavierchniu pasypajuć charčovaj sodaj, a zatym apyrskvajuć vocatam. Praź piać chvilin došku pracirajuć tkaninaj, zmočanaj u chałodnaj vadzie.
Vocat zamiest prasa
Dla taho, kab vyprastać zmorščyny na adzieńni, dastatkova jaho apyrskać rastvoram vocatu i vady (1:3). Kali jano dobra pramoknie, treba paviesić sušyć na adkrytym pavietry.
Vocat dla čystki posudu i juvielirnych vyrabaŭ
Dla taho, kab viarnuć blask srebnym vyrabam, dastatkova ich zamačyć na dźvie-try hadziny ŭ sumiesi pałovy šklanki vocatu i 2 stałovych łyžak charčovaj sody. Zatym dobra pramyć vadoju i vycierci miakkaj tkaninaj.
Sumieś vocatu i sody (1:1) dapamoža viarnuć blask miednym i bronzavym vyrabam. Dla hetaha spačatku treba pačakać, pakul skončycca reakcyja hašeńnia sody. Zatym pastaj z dapamohaj miakkaj tkaniny palirujuć vyraby da toj pary, pakul nie źniknie paciamnieńnie. Paźniej pramyć chałodnaj vadoj i pracierci miakkaj tkaninaj.
Vocat dla čystki čajnika i termasa
Kab vydalić vapnavy i minieralny adkład u čajniku, nieabchodna ŭ im prakipiacić 3 šklanki vocatu na praciahu 5 chvilin i pakinuć čajnik na noč. Na nastupny dzień zastaniecca jaho tolki pamyć chałodnaj vadoj.
Kab ačyścić termas, jaho napaŭniajuć haračaj vadoj, u jakuju dadajuć čverć šklanki vocatu. Kab prybrać plamy, dadajuć syry rys. Jon dziejničaje jak abraziŭ. Termas zakryvajuć i dobra ŭzboŭtvajuć. Zatym pramyvajuć i dajuć vysachnuć.
Čytajcie jašče: