Biełaruś atrymała ad Rasii dakumientacyju pa vytvorčaści šturmavika Su-25. Chočuć naładzić tut finalnuju zborku
Biełaruś atrymlivaje ad Rasii techničnuju dakumientacyju, nieabchodnuju dla vytvorčaści kampanientaŭ samalotaŭ-šturmavikoŭ Su-25 i ich mahčymaj finišnaj zborki ŭ respublicy. Pra heta zajaviŭ ambasadar Biełarusi ŭ RF Dźmitryj Kruty.
09.04.2023 / 08:51
U Biełarusi chočuć naładzić finalnuju zborku šturmavika Su-25. Fota: «Vajar»
«Na siońniašni dzień u prapracoŭcy Su-25. Adpaviednaja dakumientacyja zaraz vyvučajecca, pieradajecca rasijskim bokam. Ale premjer-ministram [Biełarusi Ramanam Hałoŭčankam] navat zadača stavicca bolš surjoznaja: ad zborki avijacyjnych ruchavikoŭ vyjści da finišnaj zborki samalotaŭ. Heta, viadoma, supierzadača, zadača maksimum», — skazaŭ pasoł u intervju telekanału «Biełaruś 1».
U siaredzinie lutaha na sustrečy z prezidentam Rasii Uładzimiram Pucinym Alaksandr Łukašenka zajaviŭ ab tym, što biełaruskija śpiecyjalisty «pry adpaviednaj nievialikaj technałahičnaj padtrymcy Rasijskaj Fiederacyi» hatovy pačać vytvorčaść samalotaŭ-šturmavikoŭ. Taksama Łukašenka adznačaŭ, što «biełarusy robiać dla [rasijskich hramadzianskich samalotaŭ] MS-21 i Sukhoi Superjet užo da tysiačy kamplektujučych».
Pavodle słoŭ Krutoha, ciapier dla MS-21 «prykładna 1 350 vyrabaŭ i kampanientaŭ prapanavana rasijskimi kalehami dla vytvorčaści ŭ Biełarusi», pa samalotach Ił-76 i Ił-78 «sfarmiravany partfiel zakazaŭ dla biełaruskich pradpryjemstvaŭ na bolš jak 2,1 tysiačy vyrabaŭ».
Pasoł paviedamiŭ, što ŭ najbližejšy čas biełaruskija śpiecyjalisty, jakija ŭžo naviedali avijacyjnyja vytvorčaści ŭ Kazani i Uljanaŭsku, płanujuć pabyvać na avijapradpryjemstvie ŭ Irkucku.
«My chočam, asabista parazmaŭlaŭšy, sfarmiravać doŭhaterminovyja prahramy zahruzki dvuch našych pradpryjemstvaŭ — 407-ha, 558-ha zavodaŭ [zavod hramadzianskaj avijacyi ŭ Minsku i avijaramontny zavod u Baranavičach]. Heta pieršaja taktyčnaja zadača — zahruzić našy zavody da 2030 hady hetaj kampanientnaj bazaj pa tych kirunkach, jakija isnujuć.
Dalej premjer-ministr daručyŭ aktyŭna pryciahnuć da hetaj historyi nie tolki niepasredna dva našyja profilnyja pradpryjemstvy, ale taksama [pradpryjemstvy pa vytvorčaści elektroniki] «Intehrał» i «Haryzont». Jany tut pavinny znajści svaju nišu ŭ śfiery avijoniki, mikraschiem, vadkakrystaličnych panelaŭ».
Jon adznačyŭ, što najbližejšym časam čakajecca vizit u Biełaruś vice-premjera RF Dzianisa Manturava i «na ŭzroŭni ŭradaŭ hetaja tema budzie abmiarkoŭvacca». «Heta budzie sapraŭdnym praryvam. I Biełaruś piarojdzie na zusim inšy ŭzrovień u avijabudavańni ŭ najbližejšyja hady», — miarkuje pasoł.
Čytajcie taksama:
Kruty raskazaŭ, jakija «sajuznyja prahramy» ŭžo atrymałasia całkam vykanać
ISW: Pucin choča vykarystoŭvać biełaruski VPK dla vajny, Łukašenka vymušany iści na sastupki