Z sakretnych amierykanskich dakumientaŭ stali viadomy straty ŭkrainskaj armii
Kala sta, a moža i bolš sakretnych dakumientaŭ amierykanskich śpiecsłužbaŭ źjaviłasia ŭ studzieni ŭ niečakanym miescy — u adnoj z maleńkich hrup na płatformie dla paviedamleńniaŭ Discord, jakaja vykarystoŭvajecca dla kamunikacyi pieravažna hulcami ŭ videahulni.
10.04.2023 / 11:30
Ilustracyjnaje fota z telehram-kanała BelWarriors: realii vajny, hraź u blindažy, bajcy-biełarusy
Dakumienty — heta byli PDF-kopii papiarovych aryhinałaŭ — pravisieli tam dva miesiacy, pakul adzin z karystalnikaŭ nie pierapościŭ častku ź ich u inšuju bolšuju hrupu. Paśla častka dakumientaŭ uspłyła taksama ŭ hrupie karystalnikaŭ Minecraft. Narešcie, u pačatku krasavika sfalsifikavanaja viersija niekatorych dakumientaŭ źjaviłasia ŭ prarasijskich telehram-kanałach.
Charakterna, što rasijanie pasprabavali sfalšavać kolkaść strat, paniesienych bakami kanfliktu, pa infarmacyi amierykanskaj raźviedki.
U aryhinalnym dakumiencie Pientahona, jaki byŭ padrychtavany na pačatku zimy, straty Rasii i Ukrainy aceńvalisia nastupnym čynam: zahinuła da 43 tysiač rasijskich vajskoŭcaŭ i da 17 500 ukrainskich vajskoŭcaŭ. Akramia taho, zahinuła da 41 tysiačy mirnych žycharoŭ Ukrainy.
Za zimu i viasnu razryŭ u stratach ukrainskaha i rasijskaha bakoŭ moh jašče bolš vyraści, bo na hety čas prypali sproby rasijskaha boku zachapić dobra ŭmacavanuju ŭkrainskuju fartecyju Bachmut. Miarkujučy pa daniasieńniach ź miescaŭ pra intensiŭnaść bajoŭ i dynamiku padliku pachavańniaŭ u Rasii, heta byŭ pieryjad, kali rasijskija siły, asabliva pryvatnaja vajskovaja kampanija «Vahnier», nieśli najbolšyja straty.