На Лію Ахеджакаву напісалі данос у Генпракуратуру
Расійскі актывіст Віталь Барадзін звярнуўся да генпракурора РФ Ігара Краснова з просьбай распачаць у дачыненні да актрысы Ліі Ахеджакавай справу паводле некалькіх артыкулаў Крымінальнага кодэкса. Тэкст звароту распаўсюдзіў тэлеграм-канал «Кровавая барыня».
11.04.2023 / 14:19
Барадзін заявіў, што Ахеджакава крытыкуе «прынятыя дзяржаўнымі органамі і прэзідэнтам РФ пастановы і палітыку ў дачыненні да спецыяльнай вайсковай аперацыі, якая праводзіцца РФ ва Украіне» і нібыта фінансуе УСУ (сама Ахеджакава гэта адмаўляла).
Аўтар даносу папрасіў распачаць у дачыненні да Ліі Ахеджакавай крымінальную справу паводле артыкулаў аб дзяржаўнай здрадзе, «дыскрэдытацыі» арміі РФ і распальванні нянавісці альбо варожасці. Таксама ён заклікаў абвясціць артыстку «замежным агентам» і пазбавіць яе дзяржаўных узнагарод і званняў.
Пасля поўнамаштабнага расійскага ўварвання ва Украіну Лія Ахеджакава неаднаразова выступала за спыненне вайны і заклікала людзей не маўчаць пра сваю антываенную пазіцыю.
На пачатку лютага тэатр «Сучаснік» у Маскве пазбавіў Лію Ахеджакаву апошняй ролі з-за «гнеўных лістоў» у яе адрас, пасля чаго артыстка звольнілася адтуль.
Рэжысёр Кірыл Сярэбранікаў правёў акцыю падтрымкі «Лісты для Ліі». Прыхільнікі напісалі Ахеджакавай 15 тысяч лістоў.
Чытайце таксама:
Лія Ахеджакава ў развітанні са сцэнай узгадала ліст падтрымкі чалавека, які прайшоў Акрэсціна