Minskim arandadaŭcam i nie śniłasia. Kolki biełarusy płaciać za zdymnyja kvatery ŭ Polščy i Litvie
Pacikavilisia ŭ biełarusaŭ, jakija žyvuć u Vilni, Varšavie i Biełastoku, kolki tyja płaciać za arendu žytła ŭ hetych krainach.
19.04.2023 / 13:16
Vilnia
Staŭki na arendu žytła ŭ stalicy Litvy startujuć z adznaki ŭ 200 jeŭra. Za takija hrošy možna raźličvać na nievialikuju adnapakajoŭku ŭ nie samym prestyžnym rajonie ź nie samym śviežym ramontam. Bolš-mienš hodnyja varyjanty zdajucca pa cenach ad 300-350 jeŭra.
Dvuchpakajoŭki z 400 jeŭra, ale znajści niešta hodnaje pa staŭcy nižej za 450 jeŭra ŭ miesiac nie atrymajecca.
Trochpakajovyja kvatery zdajuć pa staŭkach ad 550 jeŭra ŭ miesiac. Heta što tyčycca prapanoŭ na adnym z papularnych litoŭskich sajtaŭ pa pošuku nieruchomaści.
Kolki ŭ realnaści biełarusy płaciać za arendu kvatery ŭ Vilni, my spytali ŭ našych čytačoŭ.
Adna z čytačak kaža, što za adnapakajovuju kvateru-studyju płoščaj 35 m² z dobrym ramontam za 20 chvilinaŭ chady ad centra płacić 500 jeŭra. Da leta minułaha hoda jana płaciła za jaje pa 400 jeŭra ŭ miesiac. Kamunalnyja płaciažy ŭ letni pieryjad składajuć kala 80 jeŭra, a ŭ zimovy kala 120, u kvatery pražyvajuć dva čałavieki.
Inšy čytač ź Vilni za 500 jeŭra zdymaje dvuchpakajoŭku ŭ centralnaj častcy horada. Płošča kvatery 39 kvadrataŭ. Kamunalnyja płaciažy ŭ letni pieryjad składajuć da 100 jeŭra za miesiac, a ŭ zimovy 150-180. U kvatery pražyvajuć dvoje darosłych ź dziciem.
Jašče adna siamja biełarusaŭ zdymaje ŭ Vilni dvuchpakajoŭku płoščaj 58 m² za 680 jeŭra. Heta całkam meblavanaja kvatera z sučasnym ramontam i raznastajnaj technikaj. Kamunalnyja płaciažy ŭ zaležnaści ad siezonu vahajucca ad 100 da 180 jeŭra. U kvatery taksama pražyvaje dvoje darosłych ź dziciem.
Biełarus, jaki zdymaje dvuchpakajovuju chruščoŭku płoščaj 41 m², płacić za arendu kvatery 490 jeŭra ŭ miesiac. Mužčyna pražyvaje ŭ kvatery adzin. Kamunalnyja płaciažy ŭ letni pieryjad składajuć kala 60—70 jeŭra, a ŭ zimovy — 120—140 jeŭra.
Samy minimum, pra jaki raspaviali našy čytačy — heta 420 jeŭra ŭ miesiac za dvuchpakajoŭku płoščaj 52 kvadraty ŭ centry Vilni sa ścipłym ramontam. Praŭda, hetyja ludzi zdymajuć jaje ŭžo piaty hod. Da 2022-ha jany zdymali jaje za 350 jeŭra ŭ miesiac.
Maksimum, pra jaki padzialilisia čytačy «Našaj Nivy», — heta 750 jeŭra za trochpakajoŭku płoščaj 49 m² blizu centru z dobrym ramontam. Kamunalnyja płaciažy ŭ zaležnaści ad siezonu vahajucca ad 100 da 180 jeŭra.
Tym nie mienš, jak adznačajuć surazmoŭcy, nazvanyja ličby daloka nie maksimalnyja, za jakija biełarusy zdymajuć žyllo ŭ litoŭskaj stalicy. Mnohija ajcišniki zdymajuć bolš darahoje žytło, staŭki na jakoje dasiahajuć 1000 jeŭra na miesiac i bolej.
Taksama treba ŭličvać, što dla arendy žytła ŭsie apytanyja pakidali haspadaram kvatery zastavu jak za miesiac arendy kvatery. U zaležnaści ad kankretnaha vypadku, haspadary patrabujuć załoh u pamiery roŭny 1—3 miesiacam arendy.
Varšava
Staŭki na arendu žytła ŭ Varšavie značna vyšejšyja. Za adnapakajoŭku ŭ polskaj stalicy daviadziecca vykładać ad 2500-3000 złotych (kala 550-650 jeŭra). Plus kamunalnyja pasłuhi.
Čytačy zdymajuć adnapakajovuju kvateru-studyju za 3700 złotych za miesiac. U hetuju sumu ŭklučany kamunalnyja płaciažy. Suma nie źmianiajecca ŭ zaležnaści ad siezona. Ahulnaja płošča kvatery 32 m². U joj pražyvaje dva čałavieki.
Biełarusy, jakija žyvuć za 15 kiłamietraŭ ad Varšavy, kažuć, što za jeŭradvušku ahulnaj płoščaj 49 «kvadrataŭ» płaciać 2700 złotych (kala 580 jeŭra). Kamunalnyja pasłuhi kruhły hod kala 540 złotych (kala 120 jeŭra).
Inšy čytač taksama zdymaje kvateru nie ŭ samoj Varšavie, a ŭ adnym z haradoŭ, jakija prylahajuć da stalicy. Za dvuchpakajoŭku ŭ sučasnym domie z padziemnym parkinham małady čałaviek płacić 2500 złotych. Kamunałka ŭklučana ŭ sumu. Mužčyna adznačaje, što pa biahučych mierkach heta vielmi tanna, bo haspadar paśla pačatku vajny nie staŭ padymać arendu za samu kvateru, pakolki małady čałaviek žyvie tam užo treci hod, tamu arenda vyrasła zusim niaznačna i vyklučna za košt pavialičanaj kamunałki.
Taksama adznačym, što biełarusy, jakija niadaŭna šukali žyllo ŭ Polščy skardziacca, što apošnim časam aproč zastavy polskija arendadaŭcy stali ŭsio čaściej patrabavać zaklučać dadatkovuju nataryjalna zavieranuju damovu, dzie niejki inšy ŭłaśnik žytła ŭ Polščy abaviazujecca pryniać vas, kali vas raptam vysielać. Surazmoŭcy adnačajuć, što raniej takoha nichto nie patrabavaŭ.
Biełastok
Staŭki na arendu žytła ŭ Biełastoku pačynajucca ad 1000 złotych (kala 200 jeŭra) za miesiac. Naprykład, stolki płaciać biełarusy za nievialikuju adnapakajovuju «kavalerku». Praŭda, syścisia na takoj staŭcy im udałosia tolki paśla taho, jak jany paviedamili, što źbirajucca zdymać kvateru praciahły čas i hatovy ŭnieści apłatu na niekalki miesiacaŭ napierad. Pačatkova haspadar chacieŭ 1500 złotych u miesiac (kala 300 jeŭra). Vydatki na kamunalnyja pasłuhi za takuju kvateru składajuć 300-400 złotych (65-85 jeŭra).
U siarednim ža staŭki na arendu adnapakajovak u Biełastoku pačynajucca z 1700 złotych (kala 370 jeŭra), plus kamunalnyja pasłuhi.
Biełarusy, jakija zdymajuć dvuchpakajoŭku płoščaj kala 40 kvadrataŭ u Biełastoku, płaciać za jaje pa 1900 złotych u miesiac (kala 410 jeŭra). U hetuju sumu ŭvachodziać kamunalnyja płaciažy, jakija adnolkavyja niezaležna ad siezona. Surazmoŭcy adznačajuć, što ramont i azdableńnie kvatery pakidajuć žadać lepšaha. Siarod pieravah svajoj kvatery biełarusy adznačajuć łakacyju i śmiešny pa polskich mierkach zakład 300 złotych (kala 65 jeŭra).
Inšyja biełarusy płaciać za jeŭradvušku ŭ Biełastoku 1600 złotych (kala 350 jeŭra) arendy i jašče 400 złotych (kala 90 jeŭra) za kamunalnyja i inšyja płaciažy. Kvatera ŭ sučasnym domie z dobrym ramontam i azdableńniem. Ahulnaja płošča — 36 m².
Za trochpakajoŭku z dobrym ramontam, jakaja znachodzicca ŭ sučasnym domie i maje padziemny parkinh, biełarusy płaciać 3700 złotych (kala 800 jeŭra) razam z kamunalnymi płaciažami. U kvatery žyvuć dvoje darosłych i dvoje dziaciej. Surazmoŭcy kažuć, što raniej za hetu kvateru jany płacili arendu na 500 złotych mienš (kala 690 jeŭra) z kamunalnymi płaciažami. Płošča kvatery bolšaja za 60 m².
Čytajcie taksama:
«Za pustuju kvateru zapłaciŭ pad 190 rubloŭ, nie pracavaŭ navat chaładzilnik». Biełaruskija dalnabojščyki ŭ šoku ad svaich žyrovak