Lidar «ŁNR» pravioŭ tydzień u karancinie dziela sustrečy z Pucinym — aŭdyjazapis
Lidar tak zvanaj «ŁNR» Leanid Pasiečnik pravioŭ tydzień u maskoŭskim hateli biez prava pakidać svoj numar pierad sustrečaj z prezidentam Rasii Uładzimiram Pucinym — pra heta śviedčyć aŭdyjazapis žurnalistaŭ prajektu «Radyjo Svaboda» «Donbas Riealii», jaki jany atrymali sa svaich krynic u adnoj z ukrainskich śpiecsłužbaŭ.
17.04.2023 / 10:42
20 śniežnia Pucin uznaharodziŭ Pasiečnika ordenam «Za zasłuhi pierad Ajčynaj». Kadr ź videa
Žurnalisty pravieryli zapis z dapamohaj zachodniaj ekśpiertyzy ŭ Nacyjanalnym centry miedyjaekśpiertyzy pry Univiersitecie Kałarada ŭ Denviery.
Padrabiaznaściami znachodžańnia na karancinie Pasiečnik padzialiŭsia sa svaim pamočnikam Alaksandram Sarokam, jaki, pa źviestkach krynic, zjaŭlajecca byłym supracoŭnikam Hałoŭnaha ŭpraŭleńnia Hienštaba Uzbrojenych sił RF.
«Značyć, 20-ha ŭ mianie sustreča. Da 19-j ja tupa siadžu ŭ pakoi. Mianie tut začynili. Dvuchpakajovy pakoj. Siadžu, blin, užo druhi dzień, usie baki balać, sraka balić, užo lanota lažać. Nikudy nie adpuskajuć, nikudy nielha. Ježu prynosiać u numar. Uvohule, siadžu tut biazvyłazna da 19-ha ŭklučna. 20-ha adbudziecca sustreča i cyrymonija ŭznaharodžańnia», — skazaŭ Pasiečnik.
Razmova adbyłasia ŭ śniežni 2022 hoda. Pavodle aficyjnaj infarmacyi Kramla, 20 śniežnia minułaha hoda Pucin uznaharodziŭ Pasiečnika ordenam «Za zasłuhi pierad Ajčynaj», a taksama asabista sustreŭsia z kiraŭnikom akupacyjnaj administracyi Łuhanskaj vobłaści.
U aŭdyjazapisie taksama havorycca pra kanflikt unutry hrupoŭki «ŁNR» i toje, što Pasiečnik nie kantraluje kiraŭnika tak zvanaha MUS «ŁNR» Ihara Karnieta.
Raniej kapitan Federalnaj słužby biaśpieki Rasii Hleb Karakułaŭ zajaviŭ ab patrabavańni karancinu dla asobaŭ, jakija pavinny sustrecca z Pucinym. Da siaredziny kastryčnika 2022 hoda Karakułaŭ pracavaŭ inžynieram u adździele, jaki zabiaśpiečvaŭ sakretnuju suviaź prezidenta Rasii Uładzimira Pucina, a potym zjechaŭ za miažu i asudziŭ vajnu RF suprać Ukrainy.