U Maładziečnie ŭžo paŭstahodździa ź piešachodnaj darožki tyrčyć rejka. I nichto ničoha nie robić
Na jaje spatyknulisia sotni ludziej.
19.04.2023 / 12:17
Z prośbaj raskazać ab prablemie, jakuju nieabchodna vyrašyć kamunalnym słužbam horada, u redakcyju Kraj.by źviarnuŭsia maładziečaniec.
«Hetaja rejka tyrčyć hadoŭ 50 ź lišnim, jašče školnikam jaje abychodziŭ — skryžavańnie 1-ha Suchoha zavułka i vulicy Łaryna. Jana ŭžo adpaliravana abutkam ludziej, što na jaje spatyknulisia ŭ ciemry. Zrezać by hetu pieraškodu. Zastajecca tolki zdahadvacca, kolki ludziej pakalečyłasia i kołaŭ u mašynach paškodžana z-za rejki», — emacyjna napisaŭ u kraj.by Ihar.
Žurnalisty vyjechali na toje skryžavańnie. Sapraŭdy, prykładna na siaredzinie piešachodnaj darožki tyrčyć rejka. Vyšynia jaje nad ziamloj kala 8,5 santymietra.
U ciemry vierahodnaść spatyknucca na jaje vialikaja, asabliva tym, chto nie viedaje pra takuju pieraškodu. A ŭžo pra adčuvańni, što maje ad udaru ab takuju žalaziaku čałaviek, i kazać nie prychodzicca.
Adzin ź miascovych, jaki žyvie pobač, raskazaŭ, što takija kanstrukcyi stavili vielmi daŭno na rahu skryžavańnia sami žychary, kab aŭtamabili nie čaplali płaty.
— Ja svaje daŭno zrezaŭ, jašče kali darohu padsypali. Ale ziamla prasiadaje, tut ža bałota, voś jany i lezuć uvierch, znoŭ treba abrezać. A ŭ hłybiniu takija štuki nie mienš za mietr zakapanyja, — raspavioŭ surazmoŭca.
Pra rejku, jakaja tyrčyć z procilehłaha boku ad jaho doma, viedaje nie pa čutkach:
— Adnojčy žančyna na mašynie jechała, razvaročvacca na skryžavańni stała. Tak začapiła mašynaj. I ludzi tut nie raz padali, — dadaje mužčyna.
Jak bačna, rašeńnie hetaj prablemy nie patrabuje asablivych finansavych vydatkaŭ.
Čytać taksama:
U homielskim ciahniku rasijanka skrała ŭ rasijanina AirPods Pro. Razumnyja navušniki sami padkazali, dzie ich šukać