Advakaty ŭžo amal tydzień nie mohuć znajści Alaksieja Maskalova. Jaho pavinny byli ekstradavać ź Biełarusi ŭ Rasiju
Advakaty i pravaabaroncy ŭžo šeść dzion nie mohuć daznacca, dzie znachodzicca rasijanin Alaksiej Maskaloŭ, asudžany pa spravie ab paŭtornaj «dyskredytacyi» armii i zatrymany ŭ Biełarusi, paviedamlaje sajt «Možiem objaśniť».
19.04.2023 / 13:53
13 krasavika było abvieščana, što Biełaruś pieradała Maskalova rasijskamu boku, ale dzie mienavita jon znachodzicca — nieviadoma, raspavioŭ jahony advakat Dźmitryj Zachvataŭ. Pavodle jaho, na zapyty advakataŭ pra miescaznachodžańnie ich padabaronnaha nie adkazvajuć. Biełaruskich pravaabaroncaŭ da Maskalova nie dapuścili.
«U nas niama dakumientalnych paćvierdžańniaŭ, što jaho ekstradavali ŭ Rasiju. Kali b jaho vydali ŭ Rasiju, to jon moh by znachodzicca na etapie ŭ bok SIZA horada Tuły (pa miescy prapiski)», — vykazaŭ mierkavańnie Zachvataŭ.
Jašče adzin advakat Maskalova, Uładzimir Bilijenka raspavioŭ, što padavaŭ zapyty ŭ Tulskaje ŭpraŭleńnie Fiederalnaj słužby vykanańnia pakarańniaŭ, ale nie atrymaŭ adkazu. «Ja padaŭ apielacyju na prysud. Dzie znachodzicca Alaksiej, mnie nieviadoma», — paviedamiŭ Bilijenka.
Alaksiej Maskaloŭ — baćka šaścikłaśnicy Mašy Maskalovaj, jakaja namalavała ŭ krasaviku 2022 hoda na ŭroku antyvajenny malunak z nadpisami «Nie vajnie» i «Słava Ukrainie». Na Maskalova spačatku skłali pratakoł ab «dyskredytacyi» vojska z-za kamientaroŭ u «Adnakłaśnikach», a zatym zaviali i kryminalnuju spravu ab paŭtornaj «dyskredytacyi». 28 sakavika jamu dali dva hady kałonii. Samoha Maskalova na pasiadžeńni suda nie było, na sudzie abviaścili, što jon źbieh z-pad chatniaha aryštu. 7 krasavika Maskalova zatrymali ŭ Biełarusi.
Čytajcie taksama: