«Пекін не можа быць пасярэднікам у перамовах па ўсталяванні міру ва Украіне». Кітай зноў трапіў у геапалітычны скандал
Кіраўнікі МЗС Латвіі, Літвы і Эстоніі адрэагавалі на словы пасла Кітая ў Францыі Лу Шайе, які ўсумніўся ў суверэнітэце былых савецкіх рэспублік і заявіў, што «Крым першапачаткова належаў Расіі».
23.04.2023 / 09:36
Тэлеінтэрвʼю пасла Кітая ў Францыі Лу Шайе. Скрын відэа
Тэлеінтэрвʼю пасла Кітая ў Францыі Лу Шайе швейцарскаму журналісту выклікала шырокі рэзананс.
Адказваючы на пытанне аб тым, ці зʼяўляецца Крым часткай Украіны, Лу Шайе сказаў, што ўсё залежыць ад таго, як глядзець на гэтае пытанне. «Перш за ўсё… Крым першапачаткова належаў Расіі, ці не так? А потым Хрушчоў, у савецкія часы, перадаў Крым Украіне», — сказала Шайе.
Журналіст запярэчыў, што па міжнародным праве Крым зʼяўляецца часткай Украіны.
Шайе адказаў яму, што па міжнародным праве былыя рэспублікі Савецкага Саюза не маюць ніякага статусу. «У міжнародным праве былыя савецкія дзяржавы нават не маюць статусу… як бы гэта сказаць… фактычнага статусу ў міжнародным праве, таму што няма міжнароднага дагавора, які матэрыялізаваў бы іх суверэнітэт», — заявіў пасол Кітая.
На выказванні кітайскага дыпламата адрэагавалі ў МЗС Латвіі. У панядзелак у міністэрства для тлумачэнняў выклікалі ўпаўнаважанага паверанага ў справах амбасады КНР у Рызе, піша Delfi.
«Беручы пад увагу непрымальныя заявы пасла Кітая ў Францыі аб міжнародным праве і нацыянальным суверэнітэце, Міністэрства замежных спраў Латвіі патрабуе тлумачэнняў», — напісаў кіраўнік МЗС Латвіі Эдгарс Рынкевіч у Twitter.
Рынкевіч зазначыў, што гэты крок узгоднены з Літвой і Эстоніяй.
Па словах кіраўніка МЗС Літвы Габрыэлюса Ландсбергіса, заява кітайскага дыпламата тлумачыць, чаму Пекін не можа быць пасярэднікам у перамовах па ўсталяванні міру ва Украіне.
«Калі камусьці ўсё яшчэ цікава, чаму краіны Балтыі не давяраюць Кітаю як «пасярэдніку ў дасягненні міру ва Украіне», то вось кітайскі пасол, які сцвярджае, што Крым зʼяўляецца расійскім, а межы паміж нашымі краінамі не маюць ніякіх прававых падстаў», — сказаў ён.
На працягу многіх гадоў Захад казаў, што эканамічнае супрацоўніцтва пераканае дыктатараў падтрымаць міжнародны парадак, заснаваны на правілах. Але ўсё, што мы рабілі, — гэта кармілі іх эканоміку, дазваляючы ім парушаць усе правілы. Кітай робіць стаўку на тое, што мы паўторым гэтую памылку. Прыйшоў час паспрабаваць нешта іншае», — напісаў Ландсбергіс у Twitter.
Міністр замежных спраў Эстоніі Маргус Цахкна таксама асудзіў словы пасла Кітая.
«Міністэрства замежных спраў Эстоніі плануе выклікаць прадстаўніка КНР у Эстоніі, і, калі спатрэбіцца, праінфармаваць яго аб нашай гісторыі. Наша мэта — даць зразумець, што такія погляды непрымальныя і што Эстонія — суверэнная дзяржава», — сказаў Цахкна.
Чытайце таксама:
Кіраўніца МЗС Германіі заклікала Кітай паўплываць на Расію для заканчэння вайны
Чым тлумачыцца незвычайна пампезны прыём Макрона ў Пекіне
Геапалітычная гульня Кітая: якую ролю выконваюць Пуцін і Лукашэнка?