У Мінску хочуць павялічыць колькасць камер відэаназірання ў пяць разоў
Начальнік ГУУС Мінгарвыканкама Міхаіл Грыб у дэталях распавёў газеце «На страже» пра тое, як працуе сістэма сачэння ў Мінску.
29.04.2023 / 16:10
У Мінску хочуць павялічыць колькасць камер відэаназірання да 30 тысяч. Фота: ГУУС Мінгарвыканкама
Паводле яго слоў, сёння ў сталіцы ўсталявана больш за шэсць тысяч камер, і ў планах пашырыць гэтую сетку да 30 тысяч.
«Мінск — адзіны ў краіне горад, дзе ў міліцыі ёсць уласная служба відэаназірання. Яна ахоплівае ўсе станцыі метро, вакзалы, буйныя спартыўныя аб'екты і гандлёвыя цэнтры, забаўляльныя ўстановы, АЗС.
Выявы з больш чым 1100 камер, падключаных да рэспубліканскай сістэмы маніторынгу, перадаюцца ў службу відэаназірання ГУУС і транслююцца ў рэжыме анлайн на відэасцяну з 24 экранаў. Дзякуючы гэтаму, супрацоўнікі, націснуўшы ўсяго некалькі клавіш, могуць адшукаць парушальніка нават у плыні людзей і машын», — апісвае механізм сачэння Міхаіл Грыб.
Ён праанансаваў таксама стварэнне ў бліжэйшыя месяцы асобных падраздзяленняў на базах РУУС, якія будуць спецыялізавацца на працы з дронамі.
Апроч іншага, згадваецца аб стварэнні асобнай групы маніторынгу вуліц Зыбіцкай і Рэвалюцыйнай у Цэнтральным раёне Мінска, дзе сканцэнтраваная вялікая колькасць бараў і рэстаранаў.
Чытайце таксама:
У Мінску праслушку цяпер расстаўляюць не толькі ў кватэрах, але і на некаторых вуліцах