Filtr dla vady, na stvareńnie jakoha natchnili abaryhieny
Historyja filtra dla vady Ecofiltro, jaki siońnia vyrablajecca ŭ pramysłovych maštabach, pačałasia ŭ Hvatemale ŭ 1980-ch hadach. Metaj jaho raspracoŭki było zabiaśpiečyć pitnoj vadoj ŭsie rehijony krainy.
08.05.2023 / 20:43
Filtr dla vady Ecofiltro. Fota: ecofiltroeurope.com
Navukoviec ź Instytuta pramysłovych daśledavańniaŭ i technałohij Centralnaj Amieryki Fiernanda Mazaryjehas (Fernando Mazariegos) pracavaŭ nad prajektam dla Mižamierykanskaha banka raźvićcia. Jaho zadačaj było znajści efiektyŭny, ekałahičny i ekanamičny sposab ačystki dla taho, kab zabiaśpiečyć dostup usich achvotnych da pitnoj vady.
U pošuku rašeńnia jamu dapamoh žyćciovy vopyt miascovaha nasielnictva. Paśla stvareńnia i vyprabavańnia niekalkich pratatypaŭ byŭ raspracavany varyjant, jaki ciapier viadomy pad markaj Ecofiltro.
U sučasnaj raspracoŭcy vykarystoŭvajecca błok filtracyi, jaki ŭjaŭlaje saboj «kampazitny» materyjał, utvorany z troch naturalnych materyjałaŭ: hliny, piłavińnia i kałoidnaha srebra.
Hlina stvaraje mikraskapičnyja kanały va ŭnutranych ścienkach błoka filtracyi i zatrymlivaje ŭsie zabrudžvalnyja rečyvy, jakija isnujuć u vadzie, u tym liku ćviordyja čaścicy, bakteryi i parazitaŭ.
Piłavińnie ŭ pracesie pieratvarajecca ŭ aktyvavany vuhal, jaki pazbaŭlaje ad niepryjemnaha pachu, smaku i mutnaści vady niezaležna ad jaje pachodžańnia (ručaj, raka, kałodziež abo voziera).
Kałoidnaje srebra nanosicca na pavierchniu kieramičnaha filtra paśla jaho prachodžańnia praź pieč. Heta naturalny bakterycyd, jaki vykarystoŭvajecca va ŭsim śviecie dla ačystki vady i nie maje pabočnych efiektaŭ. Słoj srebra pracuje jak druhi achoŭny płast, jaki niejtralizuje zabrudžanyja rečyvy.
Čystaja vada źbirajecca ŭ emaliravanuju pasudzinu, ź jakoj zatym padajecca praz kran.
Pieršapačatkova kampanija vyrablała filtry dla vykarystańnia ŭ pramysłovych i kamiercyjnych metach. U 2000 hodzie była zasnavanaja niekamiercyjnaja arhanizacyja, jakaja ŭ 2009 hodzie zapuściła prahramu «Social Business Model», jakaja nakiravanaja na baraćbu z prablemaj dostupu da čystaj vady ŭ roznych krainach.
Jana zasnavanaja na idei sacyjalnaha pradprymalnictva, jakaja praduhledžvaje kambinacyju kamiercyjnaj dziejnaści i sacyjalnaj misii. Na praktycy heta značyć prodaž praduktu z prybytkam, jaki vykarystoŭvajecca dla pašyreńnia dostupu da čystaj vady ŭ biednych i addalenych rajonach.
Filtr pradajecca ŭ raźvitych krainach (tam jaho košt dachodzić da 180 jeŭra), a hrošy ad prodažu nakiroŭvajucca na vyrab i pastaŭku Ecofiltro pa źnižanych koštach ci biaspłatna ŭ rajony, jakija adčuvajuć prablemy z dostupam da pitnoj vady.
Pryncyp pracy Ecofiltro zasnavany na prostym i efiektyŭnym mietadzie filtracyi, jaki robić jaho dastupnym dla vykarystańnia ŭ roznych umovach.
Filtr prydatny dla šmatrazovaha vykarystańnia. Vytvorcy rekamiendujuć jaho čyścić raz na šeść miesiacaŭ. Termin słužby adnaho filtrujučaha kampanienta składaje dva hady.
Jon taksama ekałahična biaśpiečny, bo nie vykarystoŭvaje chimičnyja rečyvy dla ačystki, i moža być vykarystany ŭ jakaści alternatyvy butylavanaj vadzie, što źmianšaje kolkaść vykinutych płastykavych butelek.
Čytajcie jašče:
Mietały, bakteryi i reštki płastyku. Voś čamu lepiej nie pić vady ŭ butelkach
Try recepty, jak pazbavicca smurodu z rakaviny
Stvorany hrafienavy filtr, jaki moža ačyścić navat marskuju vadu