Беларускі рэжысёр стаў сябрам Еўрапейскай кінаакадэміі
9 мая Еўрапейская кінаакадэмія прыняла ў сваі шэрагі 462 новыя сябры. Разам з шэрагам вядомых людзей у адну з найвядомых кінаінстытуцый свету быў прыняты беларускі рэжысёр, аўтар фільмаў «Кураж», «Возера радасці» Аляксей Палуян.
11.05.2023 / 07:36
9 мая Еўрапейская кінаакадэмія прыняла ў сваі шэрагі 462 новыя сябры. Разам з амерыканскім акцёрам Уільямам Дэфо (які ў Кінаакадэміі прадстаўляе Італію), нямецкім рэжысёрам Фрэнкам Пэтцольдам («На Заходнім фронце без пераменаў»), дацка-амерыканскім акцёрам Эліятам Кроссет Хоўвам («Зімнія браты»), сербскай актрысай Яснай Джурычыч («Quo Vadis, Aida?») ды іншымі прафесіяналамі ў адну з найвядомых кінаінстытуцый свету быў прыняты беларускі рэжысёр, аўтар фільмаў «Кураж», «Возера радасці» Аляксей Палуян, піша Reform.by.
На дадзены момант у сябрах Еўрапейскай кінаакадэміі чатыры кінематаграфісты з Беларусі: рэжысёр-дакументаліст Віктар Аслюк, кінааналітык, праграмны дырэктар Ігар Сукманаў, прадзюсарка, заснавальніца і дырэктарка фестывалю Паўночных і Балтыйскіх краін «Паўночнае ззянне» Воля Чайкоўская і рэжысёр, сцэнарыст Аляксей Палуян.
Аўтар нашумелага фільма «Кураж» («Смеласць») так пракаментаваў Reform.by свае ўступленне ў сям’ю European Film Academy.
— Гэта вельмі прыемны і сымбалічны крок, — адказаў ён. — Прыемны, бо адбываецца інтэграцыя беларускага незалежнага кінематографа яшчэ глыбей ва эўрапейкія інстытуцыіі. Сымбалічны — бо наша незалежная культура вяртаецца туды, дзе гістарычна мела сваё месца — у Еўропу. Асабліва прыемна стаць часткай вялікай прафесійнай супольнасці, якая падзяляе каштоўнасці аўтарскага кінематографа, — падкрэсліў ён. — Спадзяюся ў наступны год іншыя мае беларускія калегі і каляжанкі далучацца да нас.
Сёння беларускі рэжысёр, які жыве ў Берліне, працуе над новай стужкай — поўнаметражным гульнявым фільмам пад рабочай назвай «У чаканні Бернау» — гісторыяй пра тое, як дыктатарскія рэжымы змяняюць асобу чалавека.
— Гэта таксама будзе гісторыя пра розніцу паміж пакаленнямі ў сённяшняй Беларусі, — дадае аўтар. — Гэты падзел [паміж пакаленнямі] у жніўні 2020 стаў агромністым, — лічыць Аляксей Палуян, — і яго ўжо ніяк не спыніць.
Кінематаграфіст акурат цяпер заканчвае працу над рэжысёрскім сцэнаром карціны; а ўлетку распачнецца перадвытворчы перыяд праекта — пошук акцёраў, лакацыі і каманды.
Аляксей Палуян таксама заўзяе за яшчэ адну важную ініцыятыву — Беларускую незалежную кінаакадэмію. Нагадаем, што ён з’яўляецца адным з шасці заснавальнікаў новай інстытуцыі, мэта якой — зрабіць чутным голас беларускіх незалежных кінематаграфістаў у свеце, садзейнічаць стварэнню беларускага кіно. Развіццё і прасоўванне гэтага важнага праекта, яго падтрымка — таксама ў прыярытэтах кінадзеяча.
— Спадзяюся, што маё сяброўства ў Еўрапейскай Кінаакадэміі дазволіць яшчэ больш шчыльнаму супрацоўніцтву гэтай інстытуцыі з Беларускай незалежнай кінаакадэміяй, — падкрэсліў рэжысёр.
European Film Academy была заснавана ў 1989 годзе яе першым прэзідэнтам Інгмарам Бергманам і 40 кінематаграфістамі для прасоўвання інтарэсаў еўрапейскай кінаіндустрыі. Стварэнне еўрапейскай кінасупольнасці кінематаграфістаў і, тым самым, павышэнне цікавасці і даступнасці еўрапейскага кіно для супольнасці аматараў кіно з’яўлялася і з’яўляецца адным з галоўных напрамкаў яе дзейнасціі. Кінаакадэмія прасоўвае еўрапейскае кіно, кульмінацыяй чаго штогод становіцца Месяц еўрапейскага кіно і ўручэнне Еўрапейскай кінапрэміі, а гэтаксама садзейнічае прафесійным зносінам фільммейкераў.
У цяперашні час інстытуцыя налічвае больш за 4000 сябраў з 52 краін.
Чытайце таксама:
Створана Беларуская незалежная кінаакадэмія
«Беларусьфільм» пачаў здымкі блокбастара паводле рамана Караткевіча
Больш не «Мы адзіныя». Антыпольскі фільм «Беларусьфільма» выйдзе пад іншай назвай