U Asipovičach i Bychavie schapili rabočych. Adnaho ź ich zapisali na videa pad čyrvona-zialonym ściaham
Adnaho abvinavačvajuć u tym, što zdymaŭ rasijskuju vajskovuju techniku, druhoha — što krytykavaŭ miascovuju ŭładu.
13.05.2023 / 13:52
Rusłan Rabkaviec (źleva) i Piotr Vińnikaŭ (sprava). Kadry ź videa kanała «Biełaruś 4»
Pra zatrymańnie mužčyn paviedamili mahiloŭskija televizijniki. U ich pieradačy źniavolenyja pramaŭlajuć zavučany tekst, a «niepatrebnaje» vyrazanaje. Kali mužčyn zatrymali, niajasna.
Žychara Asipovičaŭ Rusłana Rabkaŭca vinavaciać u zdymcy ešałona z rasijskaj vajskovaj technikaj. Fota jon vykłaŭ u sacyjalnyje sietki.
Akramia taho, jaho vinavaciać u raspaŭsiudžvańnie «ekstremisckaj» infarmacyi. Za kramołu apieratyŭniki paličyli apublikavanyja na staroncy Rusłana fota ź bieła-čyrvona-biełym ściaham i kadrami z zatrymańniami ludziej na pratestach. Suprać jaho, jak paviedamlajecca, raspačataja kryminalnaja sprava.
Rusłanu Rabkaŭcu 33 hady. Jon pracavaŭ na adnym ź sielhaspradpryjemstvaŭ rajonu.
Žychara Bychava Piatra Vińnikava vinavaciać u tym, što jon źviarnuŭsia ŭ adzin z telehram-kanałaŭ z prośbaj raźmiaścić videa, jakoje «źnievažaje dziejańni miascovych uładaŭ».
Taksama mužčynu vinavaciać u tym, što skidvaŭ roznym kanałam infarmacyju pra padziei ŭ rajonie. Dziejańni Piatra nazvanyja «dapamohaj vorahu».
Piatru Vińnikavu 41 hod. Jon pracavaŭ inžynieram na pradpryjemstvie «Babulin harłačyk». Na milicejskim videa jon apranuty ŭ zavadskuju ŭniformu, a pobač ź im vystaŭleny čyrvona-zialony ściah.
Za pieryjad masavych represij u praŭładnych telehram-kanałach vystaŭlena mnostva videa z zatrymanymi. U sieciva trapili i videa sa śladami katavańniaŭ.
Prapahandysty i siłaviki zdymajuć razhublenych paśla vobšukaŭ ludziej. Z nahavoranaha na kamieru vyrazajuć patrebnyja vykazvańni. Ludziej prymušajuć abhavorvać siabie, časam staviačy pierad nieabchodnaściu zmahacca za biaśpieku svaju i rodnych.
Hladzicie taksama:
Što za kabiniety, dzie prapahandysty zapisvajuć intervju z zatrymanymi?
Azaronak staŭ viadučym na sałaŭjoŭskim kanale
Chto i navošta prydumaŭ «pakajalnyja» videa? Adkazvaje pradstaŭnik ByPol Alaksandr Azaraŭ