Cichanoŭskaja abmierkavała ŭ kułuarach u Aachienie mahčymyja scenaryi padziej u Biełarusi pry źniknieńni Łukašenki
Śviatłana Cichanoŭskaja razam ź Vieranikaj Capkałaj i Taćcianaj Chomič (jakaja pradstaŭlała źniavolenuju siastru Maryju Kaleśnikavu) uziali ŭdzieł u cyrymonii ŭručeńnia premii Karła Vialikaha. Tam u Cichanoŭskaj prajšoŭ šerah kułuarnych sustreč.
15.05.2023 / 08:13
Cichanoŭskaja i Zialenski na ŭručeńni premii. Fota: Ofis Cichanoŭskaj
Letaś lidarki pratestaŭ 2020 hoda atrymali hetuju premiju, a sioleta — Uładzimir Zialenski i narod Ukrainy. Heta adna z samych prestyžnych palityčnych uznaharod u śviecie.
Napiaredadni Śviatłana Cichanoŭskaja paŭdzielničała ŭ Forumie Karła Vialikaha, dzie brała ŭdzieł u dvuch dyskusijach: pra situacyju va Uschodniaj Jeŭropie i šlachi da miru.
Raspaviała pra situacyju z palitviaźniami, Viktaram Babarykam, Iharam Łosikam, pra śmierć Mikałaja Klimoviča, prysudy partyzanam i žurnalistam.
Taksama Cichanoŭskaja zaklikała raździalać režym i narod, pakazać biełarusam jeŭrapiejskuju pierśpiektyvu, pryciahnuć režym Łukašenki da adkaznaści, u tym liku za datyčnaść da prymusovaj departacyi ŭkrainskich dziaciej.
U asnoŭny dzień cyrymonii Cichanoŭska razam z Taćcianaj Chomič i Vieranikaj Capkałaj uziali ŭdzieł va ŭračystym bohasłužeńni ŭ staradaŭnim kafiedralnym sabory Aachiena, a taksama ŭ samoj cyrymonii.
U kułuarach jany sustrelisia z prezidentkaj Jeŭraparłamienta Rabiertaj Mietsołaj, śpikierkaj Bundestaha Barbel Bas, premjeram Polščy Matevušam Maravieckim, prezidentkaj Jeŭrakamisii Ursułaj fon der Lajien i prezidentam Ukrainy Uładzimiram Zialenskim.
Cichanoŭskaja taksama vystupiła na mitynhu, pryśviečanym Ukrainie, udzieł u jakim brali prezident Zialenski i inšyja vysokija hości.
Uviečary Cichanoŭskaja asobna sustrełasia z byłoj prezidentkaj Litvy Dalaj Hrybaŭskajcie. Razmaŭlali na temu Biełarusi, źniknieńnia z publičnaj prastory i chvaroby Łukašenki, mahčymych scenaryjaŭ raźvićcia padziej, paviedamiŭ ofis Cichanoŭskaj.
Čytajcie taksama: