«Šalona ŭdziačny krainie i asabista prezidentu». Raman Pratasievič pamiłavany
Raman Pratasievič paviedamiŭ žurnalistam, što jon pamiłavany, pieradaje BiełTA.
22.05.2023 / 13:18
«Litaralna tolki što ja padpisaŭ usie adpaviednyja dakumienty, što ja pamiłavany. Heta, viadoma, prosta vydatnaja navina», — skazaŭ Pratasievič žurnalistam.
Jon skazaŭ, što najpierš «šalona ŭdziačny krainie i asabista prezidentu za takoje rašeńnie».
Pa słovach Pratasieviča, Łukašenka padpisaŭ hety ŭkaz ab pamiłavańni jašče 16 maja.
Płanaŭ na žyćcio Pratasievič pakul nie maje, kaža, što choča schadzić u trenažorku ci prosta pasiadzieć u cichim miescy na pryrodzie.
Raman Pratasievič byŭ asudžany 3 maja na 8 hadoŭ kałonii ŭzmocnienaha režymu pa spravie Nexta, ale jaho pakinuli pad chatnim aryštam da momantu ŭstupleńnia prysudu ŭ siłu.
18 maja stała viadoma, što prysud Pratasieviču ŭstupiŭ u siłu, bo apielacyi nie było.
Sud pa spravie Nexta pačaŭsia 16 lutaha. Razam z Pratasievičam sudzili Ściapana Puciłu i Jana Rudzika. Tak jak jany znachodziacca za miažoj, ich sudzili zavočna, pryhavor byŭ nastupny — 20 i 19 hadoŭ adpaviedna.
Aŭtaram Nexta stavicca ŭ vinu nie mienš za 1586 złačynstvaŭ pavodle dziasiatka artykułaŭ Kryminalnaha kodeksa, u tym liku:
— raspalvańnie sacyjalnaj varožaści (č. 3 art. 130 KK Biełarusi);
— arhanizacyja masavych biesparadkaŭ, navučańnie i inšaja padrychtoŭka asob dla ŭdziełu ŭ ich (č. 1 i č. 3 art. 293 KK Biełarusi);
— arhanizacyja hrupavych dziejańniaŭ, jakija hruba parušajuć hramadski paradak, spałučanych ź vidavočnym niepadparadkavańniem zakonnym patrabavańniam pradstaŭnikoŭ ułady, navučańnie i inšaja padrychtoŭka asob dla ŭdziełu ŭ ich (č. 1 i č. 2 art. 342 KK Biełarusi);
— publičnyja zakliki da zachopu dziaržaŭnaj ułady, akta teraryzmu, inšych dziejańniaŭ, nakiravanych na pryčynieńnie škody nacyjanalnaj biaśpiecy Respubliki Biełaruś (č. 3 art. 361 KK Biełarusi);
— stvareńnie ekstremisckaha farmavańnia i kiravańnie im (č. 1 art. 361-1 KK Biełarusi);
— paklop i publičnaja abraza Łukašenki (č. 2 art. 367, č. 2 st. 368 KK Biełaruś).
Akramia taho, Puciłu i Rudzika ŭ roznym spałučeńni abvinavacili va ŭčynieńni nastupnych złačynstvaŭ:
— zmova z metaj zachopu dziaržaŭnaj ułady niekanstytucyjnym šlacham (č. 1 art. 357 KK Biełarusi);
— finansavańnie ekstremisckaj dziejnaści (č. 2 art. 361-2 KK Biełarusi);
— dyskredytacyja Respubliki Biełaruś (art. 369-1 KK Biełarusi).
Hienprakuraturaj u intaresach dziaržavy zajaŭleny isk na bolš čym 30 miljonaŭ rubloŭ. Jaho buduć razhladać asobna.
Raman Pratasievič pryznaŭ vinu. U apošnim słovie kajaŭsia i prasiŭ nie pazbaŭlać jaho voli, zajaŭlaŭ, što paplečniki jaho vykarystali i zdali biełaruskim uładam. Taksama jon asprečvaŭ pamier škody i toje, što byŭ kiraŭnikom ekstremisckich arhanizacyj.
Pratasievič byŭ zatrymany razam z Safijaj Sapiehaj 23 maja ŭ vyniku prymusovaj pasadki ŭ Minsku samalota Ryanair rejsam Afiny — Vilnia. Niejki čas znachodziŭsia ŭ SIZA, a zatym pad chatnim aryštam.
6 maja 2022 hoda Sapiehu asudzili da šaści hadoŭ kałonii. Sud pryznaŭ jaje vinavataj u raspalvańni sacyjalnaj varožaści, źlivie danych siłavikoŭ (sprava «Čornaj knihi Biełarusi»).
24 maja Preśnienski sud Maskvy razhledzić spravu Fiederalnaj słužby vykanańnia pakarańniaŭ ab pieradačy Rasii asudžanaj u Biełarusi dziaŭčyny.