У Віцебску затрымалі Таццяну Пыцько. Яе аднагадовую дачку адправілі ў дзіцячы шпіталь
Затрыманне адбылося ўвечары 6 чэрвеня, і жанчына дагэтуль знаходзіцца пад вартай. Дачку, якой днямі споўніўся год і адзін месяц, накіравалі на ўтрыманне ў дзіцячы шпіталь — так робіцца ў тых выпадках, калі ў дзіцяці няма побач блізкіх сваякоў ці апекуноў, паведамляе БАЖ.
07.06.2023 / 19:35
Таццяна Пыцько
У праваабаронцаў ёсць падставы меркаваць, што затрыманне адбылося ў межах крымінальнай справы. Але пакуль немагчыма сказаць, ці затрыманая Таццяна Пыцько паводле той самай справы, якая тычыцца яе мужа.
Відэаператара-фрылансера Вячаслава Лазарава вінавацяць паводле арт. 361-4 Крымінальнага кодэкса («спрыянне экстрэмісцкай дзейнасці») за сувязь з недзяржаўным СМІ, прызнаным у Беларусі экстрэмісцкім фармаваннем. Ужо 4 месяцы яго трымаюць ў віцебскім СІЗА-2.
Сябры адзначаюць, што ёсць праблемы з ліставаннем: доўгі час ад Вячаслава няма ніякіх звестак. Таму невядома, на якім этапе знаходзіцца расследаванне ягонай справы і ці хутка яна трапіць у суд. Маці мела адзінае спатканне з ім — у хуткім часе пасля затрымання. Больш спатканняў ёй не дазваляюць.
Вячаслаў Лазараў не мае адваката. Цяпер гэта звыклая сітуацыя для ўсёй Беларусі: абаронцы асцерагаюцца займацца справамі «палітычных», каб не страціць працу.
У распараджэнні следства знаходзіцца аргтэхніка Вячаслава Лазарава. У дзень затрымання 9 лютага па месцы яго рэгістрацыі міліцыянты правялі ператрус: забралі мабільныя тэлефоны, відэакамеру і іншую апаратуру.
Таксама ператрус сілавікі правялі па месцы жыхарства ягонай жонкі Таццяны Пыцько, якая жыла асобна. З кватэры Таццяны забралі ноўтбук і два тэлефоны. Ёсць верагоднасць, што следчыя знайшлі там нешта такое, што палічылі падазроным.
У 2018 і ў 2019 годзе Вячаслава Лазарава двойчы каралі штрафамі паводле ч. 2 арт. 22.9 КаАП за «незаконны выраб прадукцыі СМІ». Падчас жнівеньскіх падзей 2020 года Лазарава затрымлівалі за фатаграфаванне «аўтазакаў», але тады міліцыянты пратрымалі яго некалькі гадзін у ІЧУ і вызвалілі без складання пратакола. Таццяну Пыцько таксама прыцягвалі да адміністрацыйнай адказнасці: у 2020 годзе яе аштрафавалі за ўдзел у «несанкцыянаваных мерапрыемствах».