Nie vytrymała cisku? Čamu Sabalenka pryznałasia, što nie padtrymlivaje vajnu
Adnoj z topavych suśvietnych tenisistak i pieršaj rakietcy Biełarusi spatrebiŭsia bolš čym hod, kab jasna i dakładna (vidać, nakolki jana heta moža) vykazać svaju pazicyju pa vajnie va Ukrainie. Viera Biełacarkoŭskaja razvažaje, čamu Aryna Sabalenka ŭsio ž taki pramoviła mahičnaje «Ja nie padtrymlivaju vajnu».
10.06.2023 / 14:24
Fota: AP Photo / Thibault Camus
Sabalenka pačało ciahnuć da praŭładnych biełaruskich kołaŭ zadoŭha da 24 lutaha 2022 hoda. U listapadzie 2018 hoda Aryna, tady jašče 13-ja rakietka śvietu, paprasiłasia na aŭdyjencyju da Łukašenki. Pa aficyjnaj viersii, na toj sustrečy Łukašenka pachvaliŭ jaje hulniu i zajaviŭ, što Arynie jašče jość kudy imknucca. Ale isnuje i mierkavańnie, što tady palityk akazaŭ maładoj i duža pierśpiektyŭnaj tenisistcy važnuju pasłuhu: dapamoh pakinuć spartovaha ahienta, ź jakim Aryna niekali padpisała kantrakt na kabalnych umovach.
I nie, Sabalenka zusim nie zaŭsiody była tvaram prałukašysckaj častki biełaruskaha sportu. Naprykład, u žniŭni 2020 hoda Aryna vykazałasia ŭ instahramie suprać hvałtu, praŭda, nie ŭdakładniła, kaho prosić hety hvałt spynić: «Ja nie mahu spać užo čaćviortuju noč. Ja nie mahu hladzieć na žorstkaść u dačynieńni da ludziej, jakija biezabaronnyja».
Ale potym jaje pavodziny źmianilisia. Sabalenka pakinuła svoj podpis pad praŭładnym listom spartoŭcaŭ, a na Novy hod — 2021 zaśviaciłasia ŭ televinšavańni ad Alaksandra Łukašenki. Vidać, Arynie nahadali, kamu jana musić być «udziačnaja» za mahčymaść svabodna budavać svaju karjeru.
Kali adbyłosia poŭnamaštabnaje ŭvarvańnie Rasii va Ukrainu, Sabalenka adznačyła, što nie suprać vyjści na kort z žoŭta-siniaj stužkaj u znak padtrymki Ukrainy. I tut niepakorlivuju tenisistku znoŭ ucichamiryli: dziaržkiraŭnik biełaruskaha tenisa Siarhiej Rutenka zajaviŭ, što, maŭlaŭ, Arynu nie tak zrazumieli. U vyniku žoŭta-siniaja stužka na spartoŭcy tak i nie źjaviłasia.
Ale ž niazručnyja pytańni na hetym nie skončylisia. Naprykład, u kancy 2022 hoda Aryna vykazała rasčaravańnie, što «sport niejkim čynam u palitycy», kali ŭ jaje zapytali ab prapuščanym praz spartovyja sankcyi «Uimbłdanie». A kali padčas Australian Open u tenisistki pacikavilisia, što jana dumaje pra zabaronu rasijskaj i biełaruskaj dziaržsimvoliki, taja viarnułasia da lubimaj mantry: «Ja sapraŭdy dumała, što tenis i, uvohule, sport nie majuć ničoha ahulnaha z palitykaj».
Mahčyma, Aryna i dalej adbrykvałasia b ad razmoŭ pra palityku, ale znajšłasia žurnalistka, jakaja pajšła dalej za dziažurnyja pytańni. Ukrainka Darja Mieščarakova z vydańnia Tribuna.com spytała ŭ Sabalenka, jak joj padtrymlivać dyktatara, i prapanavała vyrazna skazać: maŭlaŭ, ja kateharyčna asudžaju toje, što Biełaruś atakuje Ukrainu rakietami, i chaču, kab heta spyniłasia.
U Aryny kamientaroŭ na heta nie znajšłosia.
Nastupnuju pres-kanfierencyju na «Rałan Haros» biełaruska z dapamohaj arhanizataraŭ turniru zrabiła ŭ zakrytym farmacie: tudy trapili tolki «dobranadziejnyja» reparciory, jakija dakładna viedajuć, jak pracuje sport pa-za palitykaj u śviecie Aryny. Potym była pieramoha ŭ čarhovym raŭndzie turniru i čarhovy propusk kamunikacyi z žurnalistami — Sabalenka patłumačyła heta mientalnymi prablemami paśla pytańniaŭ pra vajnu i palityku.
A potym Aryna vybiła z turniru ŭkrainku Elinu Śvitolinu, i taja naadrez admoviłasia paciskać biełaruscy paśla matča ruku. Źjava heta niaredkaja, ukrainskija tenisisty rehularna takim čynam demanstrujuć svoj pratest paśla sustreč z rasijskimi i biełaruskimi kalehami. Ale hetym razam, vidać, Arynie nadta chaciełasia, kab hetaha pratestu nie było. Było prykmietna, jak biełaruska čakała na korcie pocisku ruki ad Śvitolinaj, chacia taja i adznačyła zahadzia, što jaho nie budzie.
U dadatak Elina akazałasia nie pieršaj ukrainkaj na sioletnim «Rałan Haros», chto sustreŭsia na šlachu Aryny — u pieršym raŭndzie jana hulała z Martaj Kaściuk, i taja zaklikała žurnalistaŭ zadavać Sabalenka pytańni pra vajnu.
Takim čynam, majem cisk z boku ŭkrainskich tenisistaŭ i niazručnyja pytańni na pres-kanfierencyjach, jakija pakinuli Arynie zusim užo mała prastory dla manieŭraŭ. A tut jašče i zachodnija žurnalisty zacikavilisia tym, što druhaja rakietka śvietu nie moža vyznačycca ź vidavočnymi rečami: mir — dobra, vajna — drenna. Tak, u Biełarusi Arynu viedajuć jak prarežymnuju spartoŭku, ale navošta ž psavać sabie reputacyju na suśvietnym uzroŭni?
Vidać, mienavita praz heta paśla hulni sa Śvitolinaj Sabalenka ŭsio ž taki zdoleła pramović na pres-kanfierencyi sakramientalnaje «Ja nie padtrymlivaju vajnu». I potym dadała, što toje ž datyčyć i Łukašenki, praŭda, udakładniła: «Nie padtrymlivaju Alaksandra Łukašenku mienavita ciapier».
Z hetaj svajoj zajavaj Sabalenka trapiła ŭ stužki navin šmatlikich suśvietnych miedyja: Politico, Washington Post, Guardian, Reuters i hetak dalej. Toj samy Siarhiej Rutenka, jaki niekali «apraŭdvaŭsia» za słovy Aryny pra žoŭta-siniuju stužku, pakul nie viedaje, jak kamientavać słovy (eks-?)ulubionki Łukašenki.
Jakim by niazhrabnym ni vyhladaŭ hety demarš Sabalenka, jon dakładna dapamoh jašče trochi padniać temu vajny ŭ suśvietnych miedyja, a taksama značna ŭskładniŭ dla režymu mahčymaść i dalej ličyć siabie «adkaznym» za pieramohi zornaj spartoŭki. I jak by my da jaje ni stavilisia, padziakujem joj chacia b za heta.
Aryna Sabalenka: Łukašenka moža kamientavać što choča, a ja prosta spartsmienka ź Biełarusi