У Вільні абмяркоўваюць, як прыцягнуць Лукашэнку да адказнасці ў межах міжнароднага правасуддзя
Святлана Ціханоўская 12 чэрвеня выступіла ў Вільнюсе на міжнароднай канферэнцыі «Адказнасць рэжыму Лукашэнкі за злачынствы супраць чалавечнасці і міграцыйны крызіс: перспектывы міжнароднага правасуддзя», паведаміла прэс-служба Офіса Ціханоўскай.
12.06.2023 / 12:54
Святлана Ціханоўская выступіла ў Вільнюсе на міжнароднай канферэнцыі «Адказнасць рэжыму Лукашэнкі за злачынствы супраць чалавечнасці і міграцыйны крызіс: перспектывы міжнароднага правасуддзя»
«Гэтая канферэнцыя — яшчэ адзін крок у аднаўленні правасуддзя ў Беларусі, — сказала Святлана Ціханоўская. — Для аднаўлення справядлівасці нам неабходна не толькі вызваліць усіх палітычных зняволеных і правесці свабодныя і сумленныя выбары, але і прыцягнуць да адказнасці ўсіх, хто здзейсніў злачынствы».
Ціханоўская зазначыла, што рэжым Лукашэнкі мае доўгі спіс злачынстваў з 1994 года: злоўжыванне ўладай, фальсіфікацыя выбараў, злачынствы супраць чалавечнасці, пазасудовыя расправы над палітычнымі апанентамі.
«Мы ведаем пра гэтыя злачынствы, але ў нас няма механізмаў, якія дазваляюць прыцягнуць рэжым да адказнасці. Спадзяюся, эксперты, якія сабраліся тут, дапамогуць нам знайсці рашэнні», — сказала яна.
Ціханоўская дадала, што ўжо цяпер мы павінны вывучыць існуючыя механізмы прыцягнення дыктатара і яго памагатых да адказнасці. Іх некалькі: універсальная юрысдыкцыя, спецыяльныя трыбуналы і спецыяльныя рэгіянальныя трыбуналы, Міжнародны суд і Міжнародны крымінальны суд.
Але пры гэтым вялікага прагрэсу, паводле яе, пакуль няма.
«Рэжым бачыць, што існуючыя механізмы не працуюць. Гэта дае яму адчуванне беспакаранасці, і рэжым толькі ўзмацняе рэпрэсіі», — сказала яна.
«Мы павінны выпрацаваць дакладную стратэгію», — заклікала яна.
Міжнародная канферэнцыя «Адказнасць рэжыму Лукашэнкі за злачынствы супраць чалавечнасці і міграцыйны крызіс: перспектывы міжнароднага правасуддзя» была арганізона Міністэрствам юстыцыі Літоўскай Рэспублікі сумесна з Law and Democracy Centre.